Boku məhkəmə 12 nəfər dini məhbus bə dırozmuddətinə zindonə cəzo məhkum kardışe

Dekabrə manqi 6-minə ruji Boku qonə cinayəton məhkəmədə Hacı Zulfiğar Mikayılov, Seyid Elman Ağayev və həniən 10 nəfər Nardarani faciə məhbuson məhkəmə bə orəx rəse.

Hakim Zeynal Ağayevi Zulfiğar Mikayılov bə 17 sor, Ruzi İsmayılov bə 15 sor, Cabir Əliyev bə 14 sor, Elman Ağayev, Faiğ Allahverdiyev, Mehman Quliyev, Mubariz İbrahimov və Ramil Seyfullayev har kəs bə 13 sor, Elxan Həsənov, Əli Huseynov, Mehman Məmmədov və Eldar Bunyadov har kəs bə 12 sor 3 manq  muddəti zindonə cəzo məhkum kardəşe.

Parlamenti 2 manq çimi bə nav cinayət-cəzo sistemi humanist karde barədə Prezident Əliyevi təklifon ğəbul kardışe. Cəyo ım humanistəti nəticədə xeyli dələdızdon, xəzinə pulon dələmurd kardə odəmon cəzo bə kam kardışe, bə kə dustəğəti vadoşe. Isət məlum bedə ki, İlham Əliyevi ım humanistətı bə dini məhbuson aidiyyətış nibən. Bimi bənə qıley co subuti məhkəmə bə AİP sədr, dini məhbus Mevsum Səmədovi munasibəte. Əv 2011-minə sori bə 12 sornə zindonə cəzo məhkun kardəşone. Im sori iyunə manqi 14-ədə Boku şəhəri Ğərədağ rayoni məhkəmə ey bə 3 sor muddəti ciddi rejiminə sərpuşə Ğobustani zindonxonə ovoştınie barədə hukm doşe. Vəkil Cavad Cavadovi bə Apellysiya Məhkəmə çe ım hukmiku şikayət vığandışe. Əmo məhkəmə çey ım şikayət təmin nıkardışe. Çəyo ey bə Ali Məhkəmə şikayət kardışe. Bı rujonədə Ali Məhkəmən  çe Boku hokuməti bə dini fəalon əleyh bardə beysurə siyasəti sədağət numayiş kardışe, Ğərədağ rayoni məhkəmə M. Səmədovi bə Ğobustani zindonxonə vığande barədə hukm ğıvvədə oqətışe.

Məqəvuji, Prezidenti cəzo sistemi humanist kardə məram bə şəhrıvandon həmməy ne, bə çəvon i ğismi aidiyyətış hestebən.