Az.R-ədə dini cameə vəziyyət

Humanizm və Etika Beynəlxalqə Təşkilati dınyo məmləkətonədə bəşəri və dini həxon vəziyyəti barədə ıştə bə 2017-minə sori dair hesabat bəyon kardəşe.

Bı hesabatədə Ğəfğazi 3 qılə məmləkətədə dini azadion vəziyyəti muğayisə Az.R dini cameon qıvoninə vəziyyəti bə dınyo ictimaiyyəti oşko kardışe.

Hesabati bə Az.R aid hissədə votə bedə ki, ım devlətədə dini və diqər azadion Konstitusiya səviyyədə təmin bedə. Əmo Respublika rəsmiyon ıştə devləti bənə toleranti təğdim karde cəhd qıley soxtəkarətie. Əv əslədə bə humanistə molyəton zidd mevğeədə mandedə, demokratiya prinsipon, dini, sıxanə azadi və diqər bəşəri huğuğon daima darıştedə. Konstitusiya hokuməti bə şəhrıvandon və  qrupon dini fəaliyyəti mudaxilə ğədəğən kardedə. Əmo real vəziyyət tamam bımi əkse, bə dini cameə munasibətədə hokumət bə repressivə tədbiron dast ğandedə.

Hesabati bə Ermənistani aid bıə hissədə qeyd kardə bedə ki, bı məmləkətədə təhsil dunyəvie, əmo Kilsə bə təhsil prosesi mudaxilə kardə icazəş heste. Erməniə Apostol Kilsə tarix bənə qıley fənni məktəbonədə tədris bedə. Əyo Katolikosi səkili de Prezidenti şəkili bərobər ehaşte məcburie. 

Qurcistonədən devləti bə dini munasibət çe Az.R-sən xeyli fərğine. Əyo Qurci Pravoslav Kilsə hokumətədə məşvərətciə huğuğ hestışe. Kilsə xadimon hərbi mukəlləfiyyətiku azadin, hərbi hissonədə dini kapellon Kilsə təsdiğ kardedə. Pravoslav Kilsə yekanə dini təşkilate ki, çe hokumətiku dotasiya sedə. Məsələn, 2012-minə sori Tbilisi hokuməti bo eyo 13,7 milyon dollar dotasiya co kardəşbe.

Humanizm və Etika Beynəlxalqə Təşkilati ım hesabati həxədə məlumat "Azadlıq.info" sayti dərc kardəşe.