Hokumət ıştə bədxarciətiku dast kəşedəni

Az.R -ədə iğtisadi və maliyyə behrani dəvom karde səbəbiku MM 2018 -minə sori büdcə de 900 milyon mənot defisiti qəbul karde məcburiyyətədə mande. Budcə pur karde ro şəhrıvandon səpe cərimə miğdar və nevon vey, sosial xarcon bə kam kardışe.

Jiqo vəziyyətədə çəş kardə bedəbe ki, hokumət ım defisiti çe arə barde ro ıştə bədxarciə vərdışiku dast bəkəşe, hətto çe Avropa iğtisadi cəhəto nəhənqə devləton ıştə əlavə xarcon dəparçıniə vaxtədə Əliyevi hokumətən çəvonku numunə pebəqəte, əhali sosial vəziyyəti çe behrani təsiri jitono bekarde ro əlavə tədbiron bəvinde.

Əmo çey orəxnə vaxtonədə doə ğəroron oşko nişon dodə ki, Boku hokumət ıştə bədxarciə siyasəti dəvom karde əzmədey. "Azadlıq.info" sayt nıvıştedə ki, bə İMT Fevğəladə İmdodə Fondi bo vəhədənə sori budcə muəyyən kardəşone, 7 qılə devləti bə ım fondi ıştə koməqi ziyod karde təəhhud bəştə səpe peqətəşe, Az.R-ən çəvon restədəy.

İlham Əliyevi dəvardə rujonədə İslamə Həmrayəti Təşkilati 58 qılə uzv məmləkətonədə bə Azərbaycan bo təhsil se omə tələbon qrant co karde barədə sərəncom doəşe. Çe tələbə təhsil və həmə jimonə, komunal, tibbi, sori i kərə bəştə vətən şe-omə xarcon bə ım qranti daxil bəben. Im qrant har sor de 20 nəfər tələbə hisobi 5 sori bədiqə 100 nəfəri əhatə bəkarde. Hərçənd ki, 2016-minə sori aprelə manqi 15-ku hokuməti azərbaycanıjə tələbəon bo təhsil se ro bə xaric vığandə layihə maliyyə nırəse səbəbiku dəparçınişe. İqlə de maqistron vığande məhdud kardışe.