Avropa parlamenti deputaton Boku hokuməti rışvə ixrac kardeku norohətin

Brusselədə Avropa parlamenti deputaton Az.R Avropa siyasətmədaron de rışvə bə dast se fakton dair qıley muzakirə dəvuniəşone. "Turan" Aqentiyyət xəbə dodə ki, əvon çe Boku hokuməti avropavojə deputaton de puli bə dast se cəhdon məhkum kardəşone, rışvə muğabilədə çe Əliyevi hokuməti bəştə şəhrvandon divon qəte, entexabati nəticon soxtə karde fakton eparçıniə ıştə bəzi həmkaron hərəkətonku norohət bıe votəşone.

Ğeyd kardəşone ki, Azərbaycani de korrupsiya bə Avropa Şura ixrac karde roy iyo ıştə lobbi soxte cəhdon bo Avropa cəmiyyəti demokratik molyəton xətomandə qıley cəhəte.

Avropa Şura Naziron Komitən Az.R hokuməti bə Bəşəri Huğuğon Məhkəmə çe İlğar Məmmədovi bedune şərt azad karde barədə qərari əməl nıkarde dair əleydə qıley prosedur tədbiri bino karde bə ğərarış sə.

Belçika Ədliyyə vəziri bə Avropa Parlamenti 2 nəfər belçikavojə deputat - Alan Desteksi və Stefan Jorisi əleyh məhkəmə istintaği bino bıe barədə ğəror ğəbul kardəşe. Im deputaton cand kərə bə Azərbaycanədə dəvardə entexabaton musbət rəy doəşone, və cəvon "Landromati" maxinasiyonədə iştirak bə oşko beşə.

Həmən ğeyd karde lozime ki, AŞPA Boku hokuməti Avropadə rışvəxorə əməlon tədğiğ karde ro xususi qıley qrup təşkil kardəşe. Im qrup ıştə tədğiğati nəticon omə sori əvvəlonədə elan bəkarde.