Az.R- ədə vəhabion fəaliyyət ziyod bıə

Az.R Sər Prokuratura rəsmi numayəndə Rauf Məmmədovi məlumat doəşe ki, Respublika əraziədə vəhabi təriğəti təbliğ kardə odəmon fəaliyyət ziyod bıə.

Əvon jenon və əğılonən bəştə təbliğati cəlb kardedən. Devləti orğanon dəvon bardə mubarizə nəticədə çəvonədə 16 nəfər kıştəşone, 21 nəfər bə cinayətə məsuliyyət cəlb kardəşone, terrorə dastəonədə iştirak karde səbəbiku 258 nəfəri şəhrvandəti ləğv kardə bıə.

 Imiən əlavə vote lozime ki, vəhabion xeyli vaxte ki, Respublika əraziədə fəaliyyət hestışone. Çimi nəticən ım bıe ki, çe DAİŞ-i tərəfədə Azərbaycani 3000 nəfər şəhrvandi iştirakşon hestbe.

Şiə dini məhbuson 3-minə qrupi məhkəmən bə orəx rəsedə. Prokurori bə "Mısılmonon İbemonə Hərəkati" sədri muavin Elçin Ğasımovi və çey 11 nəfər həmməsləkon bə 13 soriku tosə 16 sori zindonə cəzo məhkum karde piəşe. "Azadlıq.info" xəbə dodə ki, məhkəmə dekabri 22-ədə de vəkilon mudafiə votemoni dəvom bəkarde.

Əlavə vote lozime ki, dınyo mısılmonon Vəhdəti həftədə Boku Qonə Cinayəton Məhkəmə Hacı Zulfiğar Mikayılzadə, Seyid Elman Ağazadə və həniən 10 nəfər şiə dini fəalon de şər maddon 12 soriku tosə 17 sor bə zindonə cəzo məhkum kardışe. Boku hokuməti bə şiə fəalon sıvoy jıqo divon qətə tədbiron bə şiə ayin və mərasimonən ğədən və məhdudiyyət tətbiğ kardə vaxtədə məmləkətədə vəhabizmi intişar peydo karde, çəvon fəaliyyəti zumand bıe hiçən təsadufinə ko ni.