İron hiç faxt ıştə mudafiə rəketiyə bərnoməonku dast nibəkəşe.
İroni islamiyə şura məclesi xarıci siyasət və milli əmniyyət kamissiya rəis bə İroni milli mənafe əsos ğərolon mıəyyən karde təsdiğış kardə və votışe: rəketiyə bərnoməon barədə İron İslam Respublika həto vey ğədə miğdor həm ıştə zumandətiku bə dumoni bə mande.
Bə İsna aqentiyəti raporti əsos Əlaeddin Burucerdi təkidış kardə ki: İroni rəketiyə bərnomə fəğət deşmənon təhdidon vədə İroni mudafiə bərnoməon çərçivədəy ki de İroni strateqiyaon bərobər hejo dəvom peydo bəkay.
Əlaeddin Burucerdi Amerkə tojə deşmənçiyə hərəkət çı ironi 14 qılə şəxsiyət, şirkət və kəmpaniya bə sanksiya siyahi izofə karde barədə həm votışe: çı Amerkə jıqonə hərəkəton ijən ətomiyə təvafuği ləğv karde mənoədəy boçi ki əv tojə təhrimon təsdiğış kardə.
İroni islamiyə şura məclesi xarıci siyasət və milli əmniyyət kamissiya rəis ijən təkid kardə ki əqə çı Amerkə ğeyri məntıği hərəkəton dəvom peydo bıkə İron İslam Respublika yəğin bəştə mənafe əsos iyən sulhin ətomiyə texnoloqiya çərçivədə lozimə hərəkəton əncom bədoy.
Əv ijən çı Avropavıjə kişvəronku tələbış kardə ki Amerkə ğeyri ğanuniyə hərəkəton vədə sukut nıkon.
