Pars Today

Çini şərğiyə dıyoədə İronıjə Sançi nomo bıə kəşti(natə tankeri) eşe ğəmqinə hadisə ijən çandə çı İroni dıyovonon və kəşti heyəti bəfoti bəpeşt, İroni dıvlət qıləy bəyaniyə vasitə ımruj Yanvari 15-nə ruji bənə umumiyə əzo elanış kardə.

İroni dıvlət ım mısibəti bə doğ vində kəson, İroni dıyovonəti iyən nat sənayeədə zəhmət kəşon və İroni millət səbəsəlomətəti elanış kardə.

İroni Yolə Rəhbər həm zinə şəv de mesaji İronıjə Sançi nomo bıə kəşti koəkəyon bəfoti tıl iyən dıli norohətəkə hadisə səbəsəlomətəti votışone.

Həzrət Ayətullah Xamenei təsdiğ kardən: otəş qəte iyən eşe xoto İronıjə dıyovonon bəfoti ki həğiğətən dıli norohətəkə iyən mısibətin be de səmimiyəti bə əzodorə ailəon və mandə kəson səbəsəlomətəti ərz kardəm ijən xıdoku çəvon ğəmqinə dıli oromətəti və təsəli tələb kardəm.

İroni Yolə Rəhbər təkid kardən: əzizə dıyovonon ıştə vəzifə əncom doe ijən bəştə kişvəri xidmət kardero mardən ki ım vey yolə fəxre ki ğasbu tikəy ım yolə ğəmi kam bıkuy və mısibət vində kəson dıli oromətəti bois bıbu, bo mardə kəson rəhmət iyən məğfirət və bo mandə kəson səbr iyən əcri tələb kardəm.

İroni prezident Həsən Ruhani həm ım hadisə səbəsəlomətəti elanış kardə ijən de ım hadisə əlağədor bıə həmmə təşkilatonku tələbış kardə ki cidi və koşınasiyə təhğiğon vasitə Çini şərğiyə dıyoədə İronıjə Sançi nomo bıə kəşti(natə tankeri) eşe illəti mıəyyən bıkun ta bənə ım hadisə ijən tikror nıbu.

İroni məclis, İroni məhkəmə, İronədə İ Bıə Milləton Təşkilati nəmayəndə ijən co İroni və xarıci rəsmi şəxson həm ım ğəmqinə hadisə səbəsəlomətəti votışone.

Yanvari 6 Çini şərğiyə dıyoədə qıləy bo kəşti bə İronıjə Sançi nomo bıə kəşti qıniye xoto İroni natə tankeri otəş qəte boyis be.

Dəvardə rujonədə bə əzəmətinə otəşi şiddəti dəvom peydo karde xoto bə kəşti daxil bey ımkan hozzo nıbe.

İroni port və dıyovonəti təşkilati yol zinə Sançi eşe iyən çın kəşti heyəti qırd mardeku xəbəş do.

Sançi nomo bıə kəştiədə 30 nəfər İronıj və 2 nəfər çı Banğladışi dıyovonon ko kardən.