De Xanım Həzrəte Fatimə Zəhra(s) milad ruji mınosibəti təbrik.

Imruj cumə Hicri Ğəməri Cəmadiul Sani manqi 20 iyən Marti 9-nə ruje, bə təğvimi əsos ımruj de Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro moəku bıə ruji sorqərdışi bərobəre.

Həzrəte Fatimə Zəhra(s) Beesəti 5-nə sori Cəmadius Sani 20 ədə Məkkəədə bə dınyo omə.

Ə Həzrət Hırdənəti faxtiku ıştə qiramiyə dədə Həzrəte Muhəmməd(s) hidoyəton jentonədə de İlahi məərifon oşno be, ijən ıştən çı Xıdo dərqah məxsusə bandəon və İlahi elmon sərçəşmə be.

Xıdo Rəsul(s) qiramiyə kinə ijən çı şiəyon 1-nə İmomi Həzrəte Ali(ə)-i səmimiyə kədə de çokə şivə iyən sima həyot həmro və inə bey məsuliyət xıvand be anədə ki vey yolə tarix soxtə şəxsiyətoni bənə İmom Həsən(ə) iyən İmom Huseyn(ə) Xanım Fatimə(s) tərbiyə sayədə yol bıən.

Həzrəte Fatimə Zəhra(s) jimoni həmmə ləhzəon pure de isor, səbr, qızəşt, qinaət, səxavət, Xıdo ibadət iyən bə fəğıron komək karde nımonə və misdağon av həm de aliyə sima və obrazi.

Həğiğətən ə Həzrət həmmə sahəonədə çı dınyo həmmə jenon olqo iyən simvol heste.

Bə həminə idə ruji xoto İroni təğvimədə ımruj jenon və inəon ruj ğeyd bıə ijən çəvon aliyə məğom və vırəku ğədrdonəti bıdə.

Həmçınin De Xanım Həzrəte Fatimə Zəhra(s) milad ruji mınosibəti həmzəman Zinə şəviku İroni muxtəlif vırəonədə məxsus şoə mərasimon bino bıə ki ımruj həm dəvomış heste.

İroni Ğom, Məşhəd iyən co məzhəbi vırəon həm pure de cəmaəti əzəmətinə huzuri.

İroni Rəşt şəöhri Tolışi Rədio koəkəyon tərəfo ıjən ımrujnə idə ruji Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro moəku bıə ruji sorqərdışi bə şımə xususi bə həmmə tolışə jenon və tolıçə nənəon təbrik ərz kardəm, Həzrəti sayədə bıbən.