Mıni bə Zəhro(ə) kə bobənən
Xıdo-Rəsuli(s) azizə kinə Həzrət Fatmə(ə) qıləy banu və xanım be ki,deştə kamə umri bə bəşəri camiyə fəzo bənə qıləy nuri dəvəşə və çı qıləy komilə insoni zərfiyyəti vucudış bə nımoyiş noə.Əv çı qıləy jeni əzəməti məzhəre və çı Xıdovəndi xılğəti mecuzəonkuye.
İslomi təlimonədə jen bənə xılğəti ərkon iyən əsosi zikr bıə.bın nəzədə çı jeni muhimmə xısusiyyət,insoni pokə hisson rufe.əv çı reçinəti ,lutf iyən rəhməti sıfəton məzhəre.İslomi fərhənqədə jen əziz qətey bıə və çəy insoni iyən erjinə məğami bə təğdıri loyığ vindedə.bın nəzədə bə insoni erjon ayid bıə çi,cinsiyyətiku bəpe bıə çiye və de jenı-merdi cinsi qıləy rabitəş ni.havaxti qıləy jen iyən merd bəştə xılğəti ku omə təklif və vəzifəon əməlko,bə təğdıri loyığ vindey bəbe və əv de çokəti zikr və bə yod dənoey beydə.
Həzrət Fatmə(ə) çı jenonku bə tarifi loyığ iyən mecuzə nımunəonku qıləyniye.bəvədə qırd insoni erj və fəziləton bənə lovhi cəm bıə.joqo ki,peyğombəri(s) hamyəşe:”havaxti çımı bo vəhışti dıltanq bıbum,Fatmə(s) bu kardedəm və pusə kardedəm”.
Həzrət Fatmə(ə) barədə ziyodə kitobon nıvıştey bıə və İslomi çın yolə banu jimoni cəhətonku bəhs kardey bıə.doktor İsmoyl Mənsuri Laricani nıvıştə ” Mıni bə Zəhro(ə) kə bobənən” kitobe ki,tafutinə formaədə bə ə həzrəti jimon iyən şəxsiyyəti qıləy nəzəş kardə.əv ıştə “Mıni bə Zəhro(ə) kə bobənən” kitobədə çı Həzrət Fatmə(ə) şəxsiyyəti qıləy komilə ulqu nışon doydə. Zəhro dəvəşey iyən nur doə mənoədəy ki,bə həzrəte Fatmə(s) doə bıə ləğəbonku qıləyniye.çın kitobi ibaxşədə handedəmon:” Mıni bə Zəhro(ə) kə bobənən.zira dılım heste deəy Xıdo bızınom və çı ibodət,ruku iyən səjdəon məno iyən məfhumi dərkkom və çəy de arsi pur bıə çəş və çəy larzə bədən və çəy xuzu iyən xuşu sırri,çə həzrəti nımojədə bınəvəmon. Mıni bə Zəhro(ə) kə bobənən ta çımı çı dınyoku oqıniyə çəşon,bo həyğəton təmşoro ojko.Mıni bə Zəhro(ə) kə bobənən ta çımı harujə eyni ranqədə bıə ruji,çəy kəroməti şua jiyədə məfko və deçəy nuri və vucudi çımı dıli kə toykiyəti ruşinko.
Mıni bə Zəhro(ə) kə bobənən tayinki,çə həzrəti infoğinıə daston pusəkom və çəy de məhəbbəti pur bıə dovnədə yətim nəvozəti bıvindom və çəy əbaxşə rufi şua jiyədə çı pəxıləti,hərisəti iyən molpərəstətiku fariğ və co bıbum.Mıni bə Zəhro(ə) kə bobənən ta çəy elmi nuri şuaədə ıştə dıliku vironəkə cəholət və nodonəti təmizkom və çı ğəfləti qard və ğubari çəy zulolə kovsərədə bışıştom.Mıni bə Zəhro(ə) kə bobənən ta çı jeni mətonət və vuğori çəy iffət və isməti ovəynədə təmşokom və çı jeni camiyədə bıə jeni iştiroki məno bızınom.dılım heste ıştə dıli boəy bənə xolçə ojkəm ta Fatmə(s) deştə qırd buzurquvarəti əyo daxil bıbu və ıştə qırd əzəmətiiku sıxan bıvoto”.
Həzrət Fatmə(ə) bənə qıləy komilə insoni,ıştə məğam və mənziləti ıştəni çok-çoki nışon doydə və liza hiçvaxti çı dınyo keşməkeşinə koon bə ın yolə şəxsi qıləy zərbə jıey zınəşni və əvış çəy əsliyə vəzifəonku oqəteyış zınəşni.ə jenon ki,Həzrət Fatmə(ə) məktəbədə jimoni dərsi omuteydən,ıştə vucudi ğovhəri erjin zıneydən və bənə qıləy jeni ıştə məğamədə qıləy rol ifo kardedən.çəvon nəzəku bə jeni bıə həmməysə dıjdə təhğır,ıme ki,insoniyyəti meyari merdi cinsiyyətədə ğərol doydən və əvoni de merdon meyaron mığoyisə kardedən və ya çı jeni de merdi bıə tafuton nəzədə qəteydənin.Fatmə(s) çı qırd hukəma,uləma,urəfa,filosofon və çı bəşəriyyəti dıjdə tərbiyə doəkəson hədəfon təbyin və oşko kardedə və ıştə de Xıdovəndi,xıyzon iyən camiyə bıə rabitədə nışon doydə.ə həzrət çı qıləy nımunə,mıstəğil,qıləy jimoni həmro və qləy bəfodorə inə və moə insoni ulqu və məzhəre.
