Trampi tojə ğəroli barədə İroni islamiyə şura məclisi bəyoniyə.
İroni islamiyə şura məclesi nəmoyəndəon çı İroni dıvlətiku tələb kardən ta ətomiyə təvafuği mıtəğabilə ğanuni 3-nə maddə icra bıkə.
İroni islamiyə şura məclesi nımoyəndəon bəyoniyədə ğeyd bıə: Amerkə prezident çı beynəl xalğiyə ğanuni əks, ətomiyə təvafuğiku xaric bıə iyən nışoş do de siyonist rejim, mınofiğon terroristiyə qrup iyən ərəbə mırtəciə kişvəron qıləy vahid cəhbədəy.
Həminə bəyoniyə dəvomədə omə: Trampi ım ğərol çı dınyo kişvəron xuxusi bo Avropavıjə kişvəron, Çin və Rusiyəro qıləy yolə imtivone ta dınyoədə muzakirə kəy bə oj bey barədə həğiəton nışo bıdən və sabit bıkon ki çı Amerkə prezidentəti zılm və be mənteğəti peştədə nin.
Bə İroni məclesədə təsdiğ bıə ətomiyə təvafuği barədə mıtəğabilə hərəkəton ğanuni 3-nə maddə əsos ım təvafuğədə co tərəfon be ğanunə hərəkəton iyən sanksiyaon ijən təsdiğ karde vədə İroni dıvlət bəbe çı milləti həxon rioyət karde çərçivədə ıştən tələb əkə və dovtələbonə fəaliyəton ləğv bıkə.
Amerkə prezident Donald Trump zinə şəv İron və 5+1 qrupi miyono ətomiyə təvafuğ ki İ bıə Milləton Təşkilati səmtiku təsdiğ bıə be benəticə elan kardə iyən həminə muğaviləku ım kişvəri xaric bey fərmoni imzo kardə.
Trump ıştə voteonədə de beəsosə ittihamon bəyon karde ijən İroni bə məntəğə kişvəron daxeliyə məsələon dəxolət karde mıttəhəm kardə iyən iddioş kardə ki Tehron de ətomiyə təvafuği bə ətomiyə siloh dast peydo kardedə.
Ətomiyə təvafuğiku Amerkə i tərəfiyə hərəkət iyən çəyku xaric bey qıləy holədə vaği bəy ki ta ım zəmon muxtəlifə kişvəron ıştə himoyətışon ım təvafuğnoməku elan kardən.
Bə raporton əsos, Benyamin Netanyahu, Ərəbıston iyən bəzi de Amerka və siyonist rejimi həmpeymonon çı Amerkə prezidenti ım ğəroli elan bey bəpeştə Sipiyə Kəku ıştə roziyəti nışoşon do.
