Imsornə "Ğudsi Ruj" dınyo 80-sən vey keşvəronədə ğeyd kardışone

Dınyo 80-sən vey məmləkətədə islami ummət iyunə manqi 8, Rəməzonə manqi orəxnə cımmə bənə "Ğudsi ruji" izdihamin və de əzəməti ğeyd kardışone.

İİR Prezident Həsən Ruhani ımsornə "Ğudsi Ruji" aksiyon məxsusi əhəmiyyət ğeyd kardışe, votışe ki, ımsor Amerika çe mısılmonon sıftənə ğıbilə Beytul Muğəddəsi bənə sionistə rejimi paytaxt zıne, bə Fələstinıjon, məxsusən bə Ğəzzə əhali əleyh zulm və cinayəton ziyod bıe mısılmonə umməti vəhdəti tikiən zəruri kardedə.

"Maide.az" bə "Mehr.ir" sayti əsasən xəbə dodə ki, İİR paytaxt Tehron və məmləkəti həniən 900 şəhəronədə de "Beynəlxalğə Ğudsi Ruj"i və Fələstini işğali 70-minə sorəqardışi munasibəti təşkil bıə şemonon bə AİŞ Ğudsi çe sionistə rejimi paytaxt zıne etirazə və de Fələstini xalqi həmrayəti şuaron dəvardin.

Bokuədə "Ğuds islami dınyo vəhdət və izzəti simvole" nomədə konfrans dəvarde. Im tədbiri natiğon ğeyd kardışone ki, Ğudsi mudafə azadi, ədalət və insonəti mudafiə kardeye. Im ruj həmmə islami dınyo oğoəti və bə vəhdət omə ruje.

De "Ğudsi Ruji" əlağədar Bokuədə i qrup imoninə odəm çe İsraili Az.R səfarəti vədə etirazə aksiya dəvuniəşone. Polson əvonşon dəstqir kardə. Həmon odəmon arədə İslami Muğavimətə Hərəkati sədr Revşən Əhmədliən heste. Im aksiya bə video kəşə jurnaliston bə polison təzyiği məruz mandən, polison çəvon kəşə video materialon  dastokuşon sə.