Xoşro:fələstinıj iyən yəmənıjə hırdənon kışte vəy bəpe qətə bıbo.

İ bə milləton təşkilatdə İron İslam Respublika daimə nımayəndə zinə əsrə vaxti "silahlinə daveonədə hırdəniyon vəziyəti" nomo əmniyət şura iclosədə fələstinıj iyən yəmənıjə hırdənon kışte vəy qəteş tələb karde.

Bə İRNA xəbon əsosi Ğulaməli Xoşro votışe: qıləy holədə ki sionist rejim bə fələstinıjə hırdəniyon ğətliami dəvom dodə de təəssufi İ bə milləton təşkilati rəisi hozzı kardə məlumatdə desbə ısət ım rejim silahlinə daveonədə hırdəniyon həxi ləğv kardəkəson siyahiədə ğərorış qətə ni.

İ bə milləton təşkilatdə İroni daimə nımayəndə Ğəzzə məntəğədə Oqarde həxi dincə aksiyaədə bə iştirakəkə fələstinıjə hırdənon zid dəvardə manqonədə bə sionist rejimi canqiyə cinayəton işarəş karde və ıştə qəpon dəvomədə əlavəş karde sionist rejim dınyoədə hırdən əkışton siyahi əvvələdəy və bəpe omə sori İ bə milləton təşkilati rəis ım rejimi ğeyd bə siyahiədə ğəror bıdə.

Xoşro eyne holədə Səudiyə Ərəbıston iyən İ bə ərəbon əmirəti rejimon tərəfo bə yəmənıjə hırdənon kışte işarəş karde və votışe: yəmənıjə hırdəniyon dəhşətinə vəziyyət fəğət de fələstinıjə hırdəniyon vəziyyət muğayisə kardənine.

İ bə milləton təşkilatdə ironi daimə nımayəndə silahlinə daveonədə hırdəniyon ğətliami ve be iyən çəy vəy qəte zərurəti barədə bə İ bə milləton təşkilati rəisi hozzı kardə bə məlumaton işarəş karde və votışe:ım təşkilat bəpe bəştə vəzifon Fələstin,Yəmən və dınyo coqlə vıronədə hırdənon ğətliami vəy qəteyu əməl bıkən.

Xoşro əlavəş karde əqər ım vəziyəti vəy qətə nıbo dınyo omə rujonədə silahlinə daveon iyən çimisə ve hırdəniyon kışteyu bə botilə devrob şohid bəbe.

İ bə milləton təşkilatdə ironi daimə nımayəndə eyne holədə işarəş karde daveon vəy qəteyu iyən ısətnə silahlinə daveonədə hırdənon kışte vəyqəteyu fəaliyəton ve bıbon .

Əmniyyət şura zinə iclosi oxoyədə silahlinə daveonədə hırdənon həxi ləğv nıbe xoto qıləy ğətnaməş bə imza rosin.