De terrorizm mıştərəkə mubarizəonro İron və Pakistoni miyono həmkarion.

Qeneral Mayor Muhəmməd Bağıri və Pakistoni ərtış zəmini ğıvvon fərmondə zinə şəv qıləy mıştərəkə bəyoniyə sadir kardışone.

Bə İrib raporti əsos ım bəyoniyə ki İroni həmmə silohinə ğıvvon mıştərəkə ğərorqo və Pakistoni ərtış zəminiyə ğıvvon fərmondə miyono imzo bıə 2 qılə kişvər əmniyyət, de terrorizm mubarizə barədə iyən informasiya vırə bə vırə kardero bə həmmə tərəfinə hərbi əloğəon rəsey ro cəhd karde təkid kardışone.

Bə həminə bəyoniyə əsos 2 tərəf ğərore ki dəvomin, çand mərhələi və mıştərəkə əməliyoti iyən təkid ki əloğəon xoto sərhəddiyə məntəğəon əmniyyət icod kardero votımonışon bıbu.

Məntəğə ğanunon və beynəl xalğiyə mıtod və şivəon həm bəpe sərhəddiyə əmniyyətiro 2 qılə ərtışon tərəfo istifodə bıbu.

Im bəyoniyə dəvomədə ijən ğeyd bıə: 2 qılə kişvər ıştə sərhəddiku bə yande təcavoz və huccom karde icozə ni bədan və məntəğədə stabiləti iyən sulhi bəpo karde.

De icbor bıə təhdidon mubarizə barədə iyən bənə İŞİD malti milliyə terroristiyə qrupi vədə mande sahədə bəştə məsuliyət iyən təəhhudaton pobənd bə manden.

Qeneral Mayor Bağıri ki çand ruj çımiku bə nav de Pakistoni ərtış zəminiyə ğıvvon fərmondə qeneral Ğəmər Cavid Bacva rəsmi dəvəti bə Pakiston səfərış kardə be ıştə səfəri cərəyonədə çandə hərbi bazaon və sərhəddiyə məntəğəonku diyə karde kənoədə de Pakistoni hərbi və siyasi rəsmi şəxson əcumlə Pakistoni prezident Məmnon Husein vindımon və muzakirəş kardə.