Azərbaycan Respublika rabitəon vəzir: İroni cıvonon elmi səviyə vey əlae.

Azərbaycan Respublika inkişofinə texnoloqiyaon və rabitəon vəzir Ramin Ğulizadə zinə Tehronədə de İron İslam Respublika informasiyaon texnoloqiya və rabitəon vəzir Muhəmməd Cəvad Azəri Cəhrumi didorış kardə.

Bə Telerədio aqentiyəti raporti əsos Ğulizadə ım didorədə İronədə bərpo bıə elektronik, kompyuter və elektronik təcarət(Elekomp) 24-nə nımoyışqo veyə keyfiyətiku ıştə roziyəti nışoş doe və votışe: jıqo nımoyışqoon bərpo karde məxsusən startup baxşədə İroni cıvonon vey əla səviyə nışnəy.

Azərbaycan Respublika inkişofinə texnoloqiyaon və rabitəon vəzir əlovəş kardə: startup sahonədə bıə İroni inkişofiku de ım səviyə İron karde bəzne vəoməyədə startup xıdməton bə həmsoyə kişvəron irod karde şohid bebəmon.

İron İslam Respublika informasiya texnoloqiya və rabitəon vəzir həm ım didorədə işorəş kardə: dəvardə çand sor Elekomp nımoyışqoədə xarıciyə proqrami təminot əkə iyən xarıci təchizaton həvate mərkəz be əmmo ımruj veyni daxıliyə şirkəton ıştirok kardə vırəy.

Im didorədə mıəyyən bıə ki çandə icloson 2 qılə kişvəron miyono bo Azərbaycan Respublikaədə startup inkişofiro bərpo bıbu və 2 qılə kişvər beynəl xalğiyə onemononədə iyən beynəl xalğiyə həmkarion sayədə iyəndıku himoyədorəti bıkən.

İjən Azərbaycan Respublika İroniku tələbış kardə ki sosial şəbəkonədə hırdənonku çoknə muhafizə kardey barədə ironədə əncom bıə fəaliyətonku oşnoş bıbu.

Azərbaycan Respublika inkişofinə texnoloqiyaon və rabitəon vəzir de İroni rəsmi şəxson didori ijən bo  İronədə bərpo bıə elektronik, kompyuter və elektronik təcarət(Elekomp) 24-nə nımoyışqoədə iştirok karde, bə Tehron səfərış kardə.