İron Yəmənədə bə şoqirdə hırdənon avtobusi Səudiyə təcavuzkoron həmlə məhkumış karde.

İroni xarıci vəzarətxanə sıxənəvot Səudi iyən İ Bıə Ərəbə Əmirəti təcavuzkoron tojə cinoyəti Yəməni Səədə ostanədə Zəhyan şəhri bə qıləy şoqirdə hırdənon avtobusi həmlə ki çand da nəfər beqınohə hırdənon kıştə və zəxmin bey bois bıə məhkumış kardə.

Bə xarıci vəzarətxanə mediyaiyə diplomatiyə idorə raporti əsos, İroni xarıci vəzarətxanə sıxənəvot Bəhram Ğasımi ıştə həmdardəti de ım canqiyə cinoyəti ğırbon bıə xıyzonon elanış kardə və beynəl xalğiyə icma iyən dınyo bəşər həxə təşkilatonku tələbış kardə ki de harcurnə əbzar iyən roon, bə Yəməni milləti zidd təcavuzkaron cinoyəti dəvomiyəti vədə mane bıbun.

Ğasımi təkidış kardə: ım ki pısoxtə bıə koalisiya de şiddətinə bombardemoni bə sakın bıə məntəğəon və ğeyri hərbion həmlə kardedən, sobot kardedə ki təcavuzkoron canqi cıbhədə dumoyəndə məğlub bey holədən.

İroni xarıci vəzarətxanə bə Səudiyə Ərəbiston və İ Bıə Ərəbə Əmirəti kali dınyo bəşər həxon iddio əkə kişvəron silohinə himoyədorti dəvomiku ıştə təəssuf nışoş do ijən əlovəş  karde: əvon ım canqiyə cinoyətonədə xanbozin və bəpe cəvob bıdən.

Ğasımi İ Bıə Milləton Təşkilat iyən təəsirinə kişvəronku tələbış kardə ki rəyrə bə Yəməni milləti əleyh təcavuzkaron həmləon vəy ğəte xoto ıştə cəhdon ziyod bıkən iyən bo ğeyri hərbion məxsusən jenon və hırdənon əmniyyət və səlumtəti oqəte zəroriyə tədbir iyən hərəkəton əncom bıdən.

Zinə, Yəməni şimal Zəhyan şəhrədə bə qıləy şoqirdə hırdənon avtobusi Səudiyə təcavozkaron həmlə nəticəku, 39 nəfər ğeyri hərbi şəhrvənd şəhid və 51 nəfər zəxmin bıən ki veyni hırdənonku iborətin.