İMT Əmniyyətə Şura Əhvazi terrorə əməl məhkum kardəşe

İMT Əmniyyətə Şura Əhvazi terrorə əməl məhkum kardəşe, bə dınyo devləton ovardəşe ki, ım cinayətə əməli təşkilkaron bə məsuliyyət cəlb karde ro de İroni hokuməti həmkarəti bıkardon. ƏŞ bı terrorədə həlok bıəkəson xeyzonon həmdardi votəşe, bo zəxm səkəson şifo orzu kardəşe.

İm xəbə “İslamazeri.com” sayti bə TASS aqentiyyəti əsasən bə ictimaiyyəti nəzə rosniəşe.

Ali Rəhbər Ayətullah Seyid Əli Xamenei votəşe ki, ım terrori peştədə AİŞ mandedə. Səudiyyə Ərəbıston və Ərəbiə Əmiraton bə terrorçion maliyyə dastək dodən. Əvon Suriya və İraqədən çe jıqo hucumon peştədə mandə ğıvvonin.

İİR prezident Həsən Ruhaniən İMT 73-minə Sər Assambleyadə nitğ ehandəşe, votəşe ki, AİŞ rəsmiyon bə ıştə dəbastə əhdi əməl kardedənin. Bənə jıqo hərəkəti nəticə çəvon bə İroni munasibətədə bardə siyasət səhve və bə məğlubiyyət dıço bəbe.

Sər Assambleya çərçivədə İroni Prezidenti ni de Yolə Britaniya Sər Vəzir Tereza Meyi vindemonədə Əhvazi terrori hadisə dey muzakirə  kardəşe, çe Yolə Britaniya bəzi KİV ım terrori mudafiə karde bə çey nəzə rosniəşe.

İroni Kəşfiyyatə Vəzarəti məlumat pevolo kardəşe ki, əvon de Əhvaz terrori əlağədar 22 nəfərşon dəstqir kardə. Həmonə odəmon kəonədə tıpemonə maddə, silah-sursat və həniən co hərbiə ovdonon bə oşko bekardəşone.