İroni xarıci vəzarətxonə: Haağədə hıkm, çı İroni həx bey təsdiğış karde.

Amerkəku şikayət karde bəpeştə dınyo beynəl xalğ məhkəmə mıvəğğət hıkmi sadir bey bəpeştə İroni xarıci vəzarətxonə elanış karde: ım hıkm çı Amerkə sanksiyaon zalimanə və ğeyri ğanuni bey təsdiğış ka.

Bə zinə raporti əsos ım bəyoniyədə ğeyd bıə: ımruj umum iştimaiyət və dınyo, bə beynəl xalğiyə muğaviləon ehtırom karde xoto əcumlə bə ətomiyə saziş əməl kardero ədə ciddiyə iradəşone boçi ki dıvləton bə beynəl xalğiyə ğanuni əməl karde omidəon.

Bəyoniyə dəvomədə təsdiğ bıə: Haağə məhkəmədə hıkm ijən təkidış kardə ki Amerkə dıvlət deştə ğələtə siyasəton və kişvəron vədə ziyod tələbion və vositə har ruj vey bə təcridış tərəf hərəkət kardedə çən bəpe ıştə bevəcə adət və ğələtə rəftori xusosi bə milləton ələyh fişar varid karde və əvoni bə sanksiya dənoə metodiku dast bıkəşi.

İroni xarıci vəzarətxonə bəyoniyə dəvomədə ijən ğeyd bıə ki: umum iştimaiyət və dınyo mıstəğilə kişvəron bəpe Amerkə kişvəri ki beynəl xalğiyə muğaviləon arşiyə sahədə dırozə sabiğəş heste, jıqo ğeyri ğanuniyə cəhdon vədə məğlub və be abro bıkən.

Ətomiyə sazışiku Amerkə xaric bey bəpeştə İron Haağə beynəl xalğiyə məhkəmədə Amerkəku şikayətış karde ki nəhayətdə ım məhkəmə zinə qıləy mıvəğğət hıkmi vositə Amerkəş məhkum və ım kişvəri bə ğeyri ğanuniyə sanksiyaon ləğv karde məcborış ka.