İron kosmos sahədə de Rusiya həmkarəti bəkarde

İİR Milliə Kosmosə Mərkəzi direktor Mənuçehr Məntiği bə jurnaliston məlumat doəşe ki, İroni “Şərifsat” peyki bə kosmos vığande bə di dəqınie səbəb əv bıe ki, bə çey sənibəton sərf nəzər karde ehtiyac hestbe. Isət ım peyk de “Dusti” nomi bə fəzo vığande ro hozo vəziyyətədəy. Məntiği həmən votəşe ki, bə kosmos kosmonavt vığande sahədə İroni tərəf de Rusiya həmkarəti kardedə. Həmən İron ısət kosmos elmi səviyyədə 14-minə rutbəku 3 pillə bə nav şə, bə 11-minə rutbə ros bıə.

Azərtac aqentiyyətiən xəbə doəşe ki, oktyabri 13-ədə Moskvadə Rusiya, İron və Az.R enerji sistemon bə yəndı obaste ro 3 tərəfinə vindemoni iminə iclas dəvardə. İclasədə Rusiya, İron və Az.R enerqetika vəzirion muavinon Anatoli Yanovski, Homayun Xayeri və Natiq Abbasovi iştirakşon bıə. Tərəfon bə ğəror omən ki, 2019-minə sori 3 qılə devləti vahidə elektrikə sistemi çərçivədə bə İron bərği nəğl karde dəvinə bıkardon.

Bı dəvardə rujonədə Tehronədə 11-minə Nanotexnoloqiya Numayişqahi obemonə mərasim dəvardə. İroni Elm və Texnoloqiya təsisati vitse-prezident Sorena Sattari votəşe ki, İİR nanotexnoloqiya sahədə dınyo devləton arədə 4-minə vırədə ğəror qətedə, çe nanotexnoloqiya məhsulon i sornə ticari devriyyə 1 milyard 400 milyon dollari dəvardə.

İİR hartərəfinə inkişafi nailiyyətonədə qıleyən çe farsi zıvoni beynəlxalğə reytinğədə nufuzi ziyod beye. İslami Elmon İstinadə Mərkəzi sədr Məhəmməd Cavad Dehqani 13-minə Beynəlxalğə bə Farsi zıvon və ədəbiyyati dair konfransədə ğeyd kardəşe ki, 1997-minə soriku tosə 2017-minə sori dəvardə 20 sorədə farsi zıvonədə çap bıə elmiə məğalon miğdar 40 kərə ziyod bıə, çey beynəlxalğə reytinğ 30-minə vırəku bə 15-minə vırə barz bıə.