İroni mərkəziyə banki rəis: Amerkə İroni nati sanksiyaədə məğlub bıə.

İroni mərkəziyə banki rəis de işorə bə Tehroni zidd Amerkə zalimanə sanksiyaon təkidış kardə: ımruj bə həmmə subut bıə ki Amerkə, İroni nati de hər dəlil və bəhonə kamilə təhrim karde və ə bə sıf rosniyeye macəraədə məğlub bıə.

Bə Telerədio aqentiyəti raporti əsos, İroni mərkəziyə banki rəis zinə Twitterədə ıştə şəxsiyə səhifədə nevıştışe: İroni nati hıniye sanksiyaku muxtəlifə kişvəroni qədə qədə istisno karde, çı İroni bəromə və ticariyə vəome vəziyət veyni mıəyyən bıə.

Hemməti əlovəş do: İroni mərkəziyə bank tojə manqonədə ıştə valyutə bə çok vəzyət rosnəşe, de əvəz blə şəroyeti, hətto bo vey saxtə vəziyəti iyən ıştə nati sadir kardey minimum bey xoto həm mıtənosibə bərnoməonşe.

İroni mərkəziyə banki rəis xatircəm be ki İroni yolə millət Amerkə sanksiyaonku de muvəğğəğiyəti davardedə.

Amerkə 2018-nə sori Mayə manqi 8 de ətomiyə sazışiku xarıc bey, co kərə de bə İroni zidd ıştə sanksiyaon oko doe təhdidış kardə, həmonə kişvəron ki bə İroniku nati hırye idomə bıdən, təhrim bəkardəş

Amerkə detosə Novambri 4 bə İroni nati mıştəriyon mıhlətış do ki ıştə nati hırye İroniku bə sıf bırosnon.

Im qıle holədəy ki Amerkə xarıci vəzir Mayk Pompeo zinə votəş be: Vaşenqton 8 qılə kişvəri çı İroni nati tojə sanksiyaonku istisno bəkay.

Çımiku bənav həm Belomborq aqentiyəti elanış kardə: Amerkə  bə 8 qılə kişvər əcumlə Çin, Yaponiya, Hındostan və Cənubiyə Koreya icozəş bədoy ki 2018-nə sori Novambri 4ədə bə Tehroni əleyh 2 minə dıvrə sanksiyaon icra bino bey bəpeştə bə İroniku nat hırye dəvom bıdən.