Rusiya de İroni həmkarəti dəvom bəkarde

AİŞ bə İİR əleyh tətbiğ kardə sanksiyon bə beynəlxalğə ğanunon ziddin. Əvon de ım roy İroni muvəffəğiyyətinə inkişafi vəy se və bey mane bıe pidəşone. Əmo İroni muttəfiğə devləton dey ıştə iğtisadi, siyasi və mədəniə əlağon həniən zumand karde əzmi numayiş kardedən.

Rusiya Xarici Koon vəziri muavin Serqey Ryabkovi votəşe ki, Rusiya İroni çe Amerika sanksiyonku ziyan nıvinde ro har imkanono istifadə karde məramış heste. Ey de İİR Xarici Koon vəziri muavin Abbas Ərakçi didorədə ğeyd kardəşe ki, İron bəştə atom proqrami dair muğavilə şərton sadiğe. İm muğavilə həm bə çəmə devləton mənafe, həmən bə beynəlxalğə əmniyyəti xidmət kardedə.

Dekabri 25-ədə Az.R parlamenti sədr Oqtay Əsədov bə İİR səfər bəkarde. Bə “Faktxəbər.com”sayti doə ım xəbə əsasən, Əsədov de İroni parlamenti sədr Əli Laricani, Ali Milliə Əmniyyətə Şura katib kontr-admiral Əli Şamxani vindemonon dəbəvunie. Bı didoronədə dıtərəfiə həmkarəti inkişafə prespektivon, həmən əmniyyəti məsəlon muzakirə bəben.

Dəvardə rujonədə Biləsıvo kemrukə idarədə Az.R və İİR kemrukə xidməti səlahiyyətinə numayəndon arədə didori sə qətəşe. Bı vindemonədə tərəfon kemrukə xidməti hoson və bemaneə icra kardeədə mevcud problemon çe miyono peqəte məsəlon muzarikə kardəşone.

“Maide.az” saytən Az.R -ədə ım dəvardə sori bə 30 nomədə dini ədəbiyyaton nəşri ğədəğə noe həxədə xəbə doəşe. Bə Dini Təşkilaton dair Devlətə komitə dinşunasiə ekspertiza şebə mudir Nahid Məmmədovi votəşe ki, “həmonə kitobonədə Azərbaycanə devləti elan kardə bə multikulturalə prinsipon zidd təbliğatiə fikron bıe səbəbiku bə çəvon nəşri səpe məhdudiyyət noəmone. Jiqo kitobon miğdar bə 800 qılə neze. “

Məmmədovi həmonə kitobon nomon barədə məlumat doə nişe.