Enerji sahədə İraği prezident bə de İron rabitəon zumandəti təkidış ka.

İraği prezident zinə İron İslam Respublika enerji vəziri vindemonədə bə enerji sahədə 2 qılə kişvəri rabitəon zumandəti zərurət təkidış kardə.

Bə İrna raporti əsos, İraği prezident Bərhəm Saleh ım vindemonədə ki zinə Bəğdadədə əncom bəy, votışe, həmmə sahəonədə rabitəon zumandəti məxsusən enerji və ov baxşədə əloğəon anədəy ki 2 qılə kişvəri miyono həmkarion çimiku vey inkişof doe vey əhəmiyyətışe.

Saleh ijən təkidış kardə, məntəğə həmmə kişvəron sulh və stabiləti təsbit kardey barədə yolə məsuliyətışone.

İron İslam Respublika enerji vəzir Rıza Ərdekaniyan həm ım vindemonədə həmmə baxşon əcumlə bərğ, ov və istismor karde istehsol, təchiz və mıttəxəsisə ğıvvon təlim doey sahədə de İrağ həmkarion zumand bey xoto İroni əloğəku xəbəş do.

Ərdekaniyan zinə ijən de İraği i-nə vəzir Adel Əbdulməhdi vindemonədə həm votışəş be, İron bo İraği bərği təmin, soxte və istehsol bazaon obod karde ijən lozimə texnoloqiyaon muasir karde və insoniyə ğıvvon təlim doe kamilə hozzoe.

Adel Əbdulməhdi həm ım vindemonədə votışe: bərğ sahədə bə mınosibə hələkə roon rəse iyən rabitəon zumandəti cəhətədə İrağ de İroni həmkarion komil karde pidəşe.

İroni enerji vəzir çoşəmbə rujiku de İraği enerji vəziri rəsmi dəvət ijən de həmkarion zumandəti və enerji sahədə mıştərəkə muğaviləpn imzo karde bə Bəğdad varid bıə.

Im həmkari sənəd zinə əsr 2 qılə vəziron miyono imzo bıə.