İroni siyasi və iğtisadi mevğe ğoym bedə

İmperialistə ğıvvon İslamə İnğilabi bəpeştə bə İroni xalği ım tarixiə nailiyyəti əleyh həni 40 sore ki, daima mubarizə bardedən, bə çey inkişafi mane bıe ro bə har curə təxribaton, və bə beynəlxalğə huğuğə normon ziddə əməlon dast ğandedən.

Jıqo bədxahə əməlonədə qıleyən AİŞ bə İİR munasibətədə tətbiğ kardə sanksiyonin ki, məğsədış, həmən İroni siyasiə tərəfo təcrid kardeye.

Əmo İroni devlətə rəhbəriyyəti bardə ədalətinə siyasət jıqo murtəce əhvolinə ğıvvon nısıği bə puc bekardedə. Dəvardə rujon Tehronədə Rusiya Musəlləhə Ğıvvon Sər Ğərarqahi rəisi muavin İqor Osipovi de İroni hərbiə ğıvvon Sər Ğərorqahi rəisi muavin Ğədir Nizami` didorədə 2019-minə sori ım dıqlə devləton arədə hərbiə həmkarəti barədə saziş dəbastışone.

Az.R numayəndə heyətən de iğtisadiyyati vəzir Şahin Mustafayevi səvonəti  de İİR nəğliyyat və şəhərinşa vəzir Məhəmməd Eslami` bə ico Hostoroədə terminali inşa vəziyyəti, həmən Hostoro ruy səpe inşaş nəzərədə qətə bıə pardi məkani oşno bıən. Bə “Faktxəbər.com”i istinadən ım pardi dırozi 100, hevuji 18 metr bənine. Vəziron didorədə ğeyd kardəşone ki, çəmə keşvəron arədə ım sor ticari devriyyə 73% ziyod bıə, Az.R-ədə İronə şirkəron miğdar bə 700 rəsə.

İroni Rabitə və Elmi Texnoloqiya vəzarəti sərdar Məhəmməd Cavad Azəri Cəhrumi nezə vaxtonədə İroni “Pəyam” peyki bə kosmos vığande barədə məlumat doəşe. Həmən votəşe ki, dıminə - “Zəfər” peyk bə “Pəyam”i nisbətədə həniən proqressive, və eyən tam hozo karde ro orəxnə koon şedən.

İroni Mərkəziə Banki məlumat doəşe ki,  ım sori 7 manqədə İroni xariciə ğarz 10,7% bə kam bıə, çe 11 milyard 305 milyon dollariku bə 10 milyard 317 milyon dollar evoə. Mərkəziə Banki xariciə mılkon umumi məbləğ isə 1 trilyon dollari dəvardə.