Xərrazi: de ətomiyə sazışiku İroni xarıc bey, Avropa zərəl-ziyon bəvinde.

İroni xarıci rabitəon stratejik şura rəis votışe: bo rabitəon tale bəpe Avropa kişvəron və İroni miyono ciddiyə muzakirəon əncom bıbu.

Bə Telerədio aqentiyəti raporti əsos, İroni xarıci rabitəon stratejik şura rəis Seyed Kəmal Xərrazi zinə Tehronədə beynəl xalğiyə konflikton həl kardey koonədə fəalə qurup Norveçiku "Norf" nomo bıə mərkəzi qıləy heyəti vindemonədə əlovəş do: ətomiyə sazışiku İroni xarıc bey iyən bə Avropa və məntəğə əmniyyət çı nəticəon, yəğin de Avropa dıvləton mənafe həmohənq ni.

Xərazi Avropa vədə çı Amerkə prezident Donald Trampi siyasəton xətərnok vəsfış kardə və votışe: Avropa şərğ və ğərbi miyono ixtilof icod karde iyən Avropaədə siyasətoni bənə Breqzit ijən itərəfi millətçiyətion əcumlə xətəroni be ki Amerkə əvoni bo Avropa icodış kardə.

İroni xarıci rabitəon stratejikə şura rəis təsdiğış kardə: Tehron intizorış be Avropa bənə ətomiyə sazışi qıləy fəalə tərəfə ım sazışiku Amerkə xarıc bey bəpeştə əməliyə hərəkət əncom bıdə, əmmo əvon detosə ısət Vaşenqtoni fişaron xoto hiç hərəkəti kardə nin, və ım vey bədə nəticəonış bə İron varid kardə və hol ım ki əmə bəştə təəhhudon əməlış karde.

Xərazi ijən bə Amerkə bərnomə Polşədə anti İroni konfrensi bərpo karde işorəş ka iyən votışe: ım hərəkət de İron Amerkə deşmənyətiku coqılə oşko nımunəy və Amerkə de Polşədə ım siyasi  İronfobiya təbliğaton barde Polşa milliyə mənafe bə qirov pıqəteydə, ijən Polşə dıvləti tərəfo bə Amerkə dıvlət boc doe, Avropa şəxsiyyət iyən milləti təhğir karde hisob bəbe.

Beynəl xalğiyə konflikton həl kardey koonədə fəalə mərkəz Norveçiku "Norf" nomo bıə mərkəzi mudir Henrik Tone həm de işorə bə Avropavıjə şirkəton vədə Amerkə qonə fişaron votışe: Avropa kişvəron daxıliyə mışkulon bə çəvon siyasəton iyən dırıstə qərolon mənfiyə əsəronış noə.