Çe Amerika demokratiya xəzpuşə sıvvət

İroni inqilisə zıvoninə Press TV televiziya qıley Mərziyyə Haşemi nomədə xanım jurnalist hestışe. Əv çe AİŞ şəhrıvande. İslami dini ğəbul kardə bəpeşt ıştə Melani Franklin nom de Mərziyyə Haşemi əvəz kardəşe. Bə İron omə, PressTV-ədə bənə xəbərneqari fəaliyyət bino kardəşe.

Əv yanvari 13-ədə deştə nezə odəmon didor karde ro  bə Amerika şə. Sent- Luis şəhəri aeroportədə polisi əvış dəstqir kardə və bardəşe Vaşinqton şəhərədə bə zindon dənoəşe.

Amerika hokuməti Mərziyyə Haşemi dəstqir karde səbəbi barədə hiç qıley rəsmiə məlumat doəş ni. Bə çey əleyh hiç qıley ittihamən elan bıə  ni. “Rossiyskaya qazeta” bə Mehr aqentiyyəti istinadən xəbə dodə ki, Mərziyyə əvlodon votəşone, əvon 2 ruji bədiqə çey dəstqir beku xəbə qətəşone. Həmən ğeyd kardəşone ki, polison ey dəstqir kardeədə dey bənə çinayətkari rəftor kardəşone, məcbur kardəşone ki, hicabi evato, futbolə maykə tan bıko, bənə xətomandə cani bə çey daston qandal jəşone. Əvon həmən votəşone ki, zindonədə bo harde bey xuqə qujd dodən, əmo əv ey ğəbul kardeku imtina kardedə, iqlə hışkə kukə hardedə.

Mərziyyə zoə Huseyn Haşemi qəp jəşe ki, bə çəvon moə hələ hiç qıley ittiham elan kardəşon ni, əmo bey, bə çey bıyə və hovə bo ifadə doe ro xəbərnomə vığandəşone. Ey ımən xəbə doəşe ki, Mərziyyə Haşemi Sent-luisədə polisi bə afroamerikanon munasibətədə murtəce əməlon ifşa kardə sənədinə film kəşeədə dəstqir kardə bıə.

İİR Xarici Koon vəzir Məhəmməd Cavad Zərif`i bə Mərziyyə Haşemi dəstqiri siyasiə şantaj nom noəşe və ey ənətəxir azad karde çe Amerika hokumətiku tələb kardəşe.