Mərziyyə Haşemi bə çı səbəb dəstqir kardəşonbe

İroni Press.TV televiziya jurnalist Mərziyyə Haşemi çe Amerika zindoniku azad bıe bə peşt bə Rusiya RT televiziya musahibədə ıştə AİŞ Sent –Luis şəhərədə polison tərəfo dəstqir bıe səbəbon barədə qəp jəşe. Votəşe ki, bo Amerika polisi har qıley odəmi çe arə barde çanədə hoson bıe az ıştən şohid bim.

Sent-luisədə polisi mınış dızdie, qirəm çımı zoə tonom bıənəbe, çımı ağibəti barədə hiç kəsi xəbəş nəəbi. Xıdo bızın, əvon jıqo hadisə  bə çanədə odəmon sə vardəşone.

Mərziyyə Haşemı ımən ğeyd kardəşe ki, çey bənə şohidi dəstqir karde ro hiç qıley ehtiyac nıbe, qirəm prokuroru bey bı barədə xəbərnomə vığandəşbe, əv ıştən əşi bəvon izahat ədey. Bə qorə dəstqir karde əsasə səbəbi ıştə dini mənsibiyyətədə vindedə. Hərçənd ki, ey dəstqir kardə Federalə Təhğiğatə Buro 2 nəfər ağenton çimi səbəb de istintağə  koy obastışone. Əmo Vaşinqtonədə əvşon 10 ruji muddətədə 7 kərə istintağ karde, çəvon doə sualon isə əsasən də çey koy fəaliyyəti və İronədə jimon karde əlağədar bıe.

Ey həmən votəşe ki, zindonxonədə dey hoziə rəftor kardəşone, hiçab tan karde icazə doəşonni, bey məhbusə olət tan kardovniəşone, bə islami tələbon muvafiğ nıbə harədyon doəşone.

Əlavən vote lozime kİ, Mərziyyə Haşemi ğeyri –ğanuniə dəstqir bə mutərəqqi əhvolinə cəmiyyəti etirazi, AİŞ və İronədə çe İMT numayəndəti iqamətqahi vədə bə kutləviə aksiyon səbəb bıe be. İroni Xariciə Koon vəzir Məhəmməd Cavad Zərif`i Amerika hokumət irğçiə əmələdə qınokar zınəşbe.