İroni ıştə istehsal kardə peyk bə orbit bekardəşe

İroni, İslamə İnğilabi bəpeştə iğtisadiyyati har sahədə bə yolə inkişafi nail bıe, həni hiç qıley ğıvvə təkzib karde zınedəni. Çe Rusiya “Novaya versiya” rujnomə bə ım mevzu həsr kardə məğalədə nıvıştedə ki, bə Qərbi tətbiğ kardə sanksiyon bərəks çe İİR iğtisadyyati orəxnə 10 sorədə 18% peros bə dast varde zınəşe.

“Maide.az” saytən de İslamə İnğilabi 40-minə sorəqardışi münasibəti dərc kardə məğalədə İroni nail bıə muvəffəğiyyəton bə əhandon edaştəşe. Həmonə nailiyyətonədə qıleyən İroni bə kosmik ğodrət peqardeye. 2009-minə sori fevrali 3-də İroni kosmik sənaye ıştə istehsal kardə “Umid” raket bə kosmos vığandışe, demiən dınyoədə 9-minə devlət bıe ki, deştə texnoloqiya ıştə peyki bə orbit bekarde zıneşe. Imsornə fevralə manqi 7-ədə İroni Mudafiə vəzarəti xəbə doşe ki, “Dusti” nominə raket deştə istehsal kardə “Safir” kırniə raketi vasitə bə orbit bekardəşe.

İroni mudafiə sahədə bə dast vardə nailiyyətonən dınyo vədə numayiş kardəşe. Mudafiə sənaye istehsal kardə “Dezful” ballistik raketi dəvardə rujonədə təğdimatə mərasimədə İslami İnğilabi Pasivanon Korpusi sərdar Məhəmməd Əli Cəfəri votəşe ki, ım “zəmin-zəmin” sisteminə rakete, 1 həzo kilometr radiusədə hədəfi məhv karde zınedə. Çimi bə nav İroni hərbiə sənaye “Hoveyzə” və “Xorrəmşəhr” raketonşən numayiş kardəbe.

 İroni hərbi sənaye muvəffəğiyyəton iqlə de raket istehsali orəxedəni. 2006-minə sori ovijitonə kəşti, 2007-minə sori torpedo, 2018-minə sori ıştə hərbiə ğırkardə həvopeyma istehsal kardışe.

Im müvəffəğiyyəton həmmə İroni elmi inkişafi sayədə bə dast varde mumkun bıə. Əv 1995-minə soriku jıqoşə elmi inkişafi surətədə dınyoədə har sor iminə vırədə ğəror qətedə.