İroni xalqi, İslamə İnğilabi 40-minə sorəqardış de əzəməti ğeyd kardışe
Fevralə manqi 11, bəhmənə manqi 22-minə ruji İroni xalqi, həmən dınyo həmə irondustə cəmiyyəton İronə İslamə İnğilabi 40-minə sor de yolə əzəməti ğeyd kardışone.
Çand sa həzo odəmon Tehroni Azadi meydonədə çe İroni ən tojə tarixi ən fəxarətinə hadisə 40 sori id karde ro qırd bıəbin. İİR Prezident Həsən Ruhani im tədbiri nitğədə votışe ki, 40 sor bə nav Xıdo İroni millət çe mustəmləkə və jidastiətiku azad kardışe, İron İslamə Respublika ıştə milləti fədakarəti sayədə mustəğiləti bə dast vardışe.
Rusiya “Parlamentskaya qazeta” bə “Carqrad” sayti əsasən nıvıştışe ki, ım ruj İroni xalqi “Milyonon şemon”ədə vəhdət numayiş kardışe. Keşvəri əhali şəhər və məntəğə kuçon pur kardışone, diə məkəmon ki, həmonə ruji həvo xeyli sard bıe, voə -voş voyedəbe. Suriyavojə Rusiya jurnalist Abbas Cuma İroni kuconədə jıqo sardə həvoədə izdihaminə şemoni təsvir kardə şikilon barədə nıvıştışe ki, ımon adi foto şikil nin, İroni xalqi əzəməti nişon doə fəxarətinə kadronin.
De ım sorəqardışi munasibəti İİR Moskva səfarətxonədə idə tədbir dəvarde. Bə İRNA aqentiyyəti musahibədə MDU professor Andrey Sidorovi ğeyd kardəşe ki, İslamə İnğilabi bəpeştə İroni bə Amerika noə embarqo və sanksiyon bərəks yolə nailiyyəton bə dast vardəşe, nuvə, kosmos, nanatexnoloqiya elmon sahədə Nezə Şərği devləton arədə iminə vırə qətedə.
Bokuədən de ım idi munasibəti təşkil bıə tədbirədə İroni Az.R-ədə səfir Cavad Cahanqirzadə İroni xalqi inğilabi bəpeştə bə dast vardə muvəffəğiyəton, həmən dı qılə məmləkəton arədə orəxnə soronədə hartərəfinə inkişafi barədə votemon kardəşe. Az.R iğtisadiyyati vəzir Şahin Mustafayevi ıştə nitğədə bə İroni xalqi de ım əlamətinə idi munasibəti çe Azərbaycani hokuməti nomo təbrik votışe, tojə nailiyyəton orzu kardışe.
İron İslamiə İnğilabi muvəffəğiyyəton, ey ım dəvardə 40 sorədə qıley ədalətinə cəmiyyəti bərğər karde, ısət hətto inğilabi əleyhdaronən etiraf kardedən. Çe şah rejimi XKV Ərdəşir Zahedi bə “Raşa tu dey” televiziya musahibədə de İroni bə dast vardə muvəffəğiyyəton fəxr karde votəşe, həmən İroni muxalifət xəyanətədə ittiham kardəşe.
