Amerkə silahinə ğıvvə İroni terroristiyə siyahiədə ğərorış qəte.

İroni xarici koon vəzir bə prezdent və məmləkəti milli əmniyəti aliyə şora rəisi nıvıştə məktobədə,Asiya ğərb məntəğədə bıə Amerkə silahinə ğıvvon nomi,ironi nəzədə terroristiyə qrupon siyahiədə ğəror qəteş tələb karde.

Amerkə devlət bə ironi zid ıştə hərəkəton dəvomədə iyən bə ğıvvon təziğ nışon doeədə ki de terroristiyə qrupon mubarizə bardən məntəğədə bə Vaşinqtonı hədəfon bərpo be mane bən, ısət islamiyə inğilabi sepahe pasdaranı nomış qoya bə terroristiyə təşkilaton siyahi əlavəş kardə.

Muhəmməd Cəvad Zərif zinə bə prezdent və ironi milli əmniyəti aliyə şura rəis Həsən Ruhani nıvıştə bə məktobədə elanış ka bı ım məsələ diğğət doeədə ki Amerkə silahinə ğıvvon oşko və ğeyre oşkoə holətədə,məntəğədə bıə terroristiyə qruponku himoyə kardən iyən ım məmləkəti hərbiyə ğıvvon dim bə dim terroristiyə fəaliyəton əncom dodən Asiya ğərb məntəğədə Amerkə silahinə ğıvvon  İron İslam Respublika tərəfo terroristiyə qrupon siyahiədə ğəror qətedə.

İslami inğilabi sepahe pasdaran ğıvvə fərmondə qeneral mayor Muhəmməd Əli Cəfəri çimi bə nav bəzi xəbon nəşr be vədə ki ihtimal heste amerkəvıjon islami inğilabi sepah pasdaranı nomi terroristiyə qrupon siyahiədə ğəror bıdə reaksiyaş nışon do və elanış ka əqər jıqo axməxəti bıkən asiya ğərb məntəğədə Amerkə silahinə ğıvvon iyən əmniyətiyə ğıvvon oromətişon nibəbe.