Bə Amerika SEPAH-i terrorə təşkilat zınəy ce İİR doə cəvob.

Çe Rusiya “İnforuss.info” sayti dəvardə rujonədə çe AİŞ Ceymstaun fondi ki, çe Zbiqnev Bzejinski tərəfo binoş noə bıə, qıley məğalə dərc kardəşe. Həmonə məğalədə ım fondi təhlilqəron məcburən etiraf kardedən ki, həni dınyoədə AİŞ bənə mustəmləkəkar və işğalqəri zınedən.

Əlavən bıvotəmon ki, Amerika bə ım ğədər exrocə vəziyyət məhz çey hokuməti sədəənışton bardə nadurustə siyasəti vardəşe bekardəşe. Həmonə ğərəzkorə siyasəti əlomətonədə qıleyən çəvon SEPAH-i terrorə təşkilat elan kardeye. Hicən təəccubinə ko nıbe ki, bə Amerika ım hərəkəti hətto cey muttəfiğonən de şubhə diə kardışone. Bə “Nur-az.com” sayti istinadən, sıftə Turkiyə ki, ce NATO uzve, həmən Yaponiya elan kardışone ki, SEPAH-i bənə terrorə təşkilati zınedənin və əzınin. Yolə Britaniyan ki, çe Amerika ən nezə muttəfiğonədəy, çey XKV bəyon kardəşe ki, ım məsələ iqlə bə Amerika və İroni munasibəton aide və ce AİŞ Devlətə Departamenti İroni ərteşi bə terrorə təşkilaton siyahi daxil karde xahiş rədd kardəşe. Ce Avropa İttifaği bə Beynəlxalğə Məsələon dair Komissariatiən bı problemi ıştə munasibəti bəyon kardeku imtina kardəşe.

İslamə İnğilabi Yolə Rəhbər Ayətullah Seyid Əli Xamenei ım məsələ  barədə votəşe ki, Amerika ıştə xəyalədə bə SEPAH-i, əslədə isə bə İnğilabi və bə İroni əleyh plan kəşedə. Əlbəttə ki, çəvon ım xəbisə hərəkət hiç qıley nəticə nibədo, çəvon məkr bəvon obəqarde.

İİR Prezident Həsən Ruhaniən çe Amerika ım ğəror ciddi səhv zınəşe, votəşe ki, ım, çe SEPAH-İ dınyo xalqon arədə şehrəti həniən ziyod bəkarde.

İroni Parlamenti uzvonən  bə Amerika ım ğərori ıştə munasibət de SEPAH-i hərbiə libosi tan karde numayiş kardışone. Spiker Əli Laricani bəyon kardəşe ki, parlamenti uzvon bə İslamə İnğilabi Pasdaranə Korpusi ıştə dastəki jıqoşən dəvom bəkarden.