Ruhani: qəncin bıə uran iyən sanqinə ovi həvate ğədəğən be.

İroni prezident detosə omə 60 ruji qəncin bıə uran iyən sanqinə ovi həvate vəy qəteyku xəbəş do.

Həsən Ruhani ımruj votış: ısət i sor ətomiyə sazışiku Amerkə ğeyri ğanuni xaric bey iyən 2231 ğətnomə ləğv kardeku dəvardedə və əmə bə ətomiyə sazişədə uzv bıə kişvəron elan kardemon ki qəncin bıə uran və sanqinə ovi ijən ni bə həvatemon.

Ruhani əlovəş karde: bə ətomiyə sazişədə co mande kişvəron elan kardemon ki 60 ruji mıhlətədə əqə muzakirə bino bıbu və muzakirəonədə İroni əsliyə mənafe xusosi nat və bimə sahədə təmin bıbon, səni bəton şərton icra bəbe əmmo əqə çəmə mənafe təmin nıbu İroni tərəfo ijən vo ğərol və hərəkəton əncom bəbe.

İroni prezident votışe: ətomiyə sazişədə çəmə ğərol ım be ki urani qəncin karde miğdor 4 faiz bıbu; əmə ım ğəroli icra ni bəkamon yəni bo İroni urani qəncin karde miğdori vədə məhdudiyət ni və Ərak şəhri qonə ovi reaktori barədə həm 60 ruj çimi bəpeştə elan bəkamon ki ətomiyə sazışi çərçivədə əməl bəbe ya ım ki Ərakədə təchizaton komil bəkamon.

Ruhani ijən notaş do: bə 5 qılə kişvəron (yəni İnqiltərə, Fransə, Almaniya, Rusiyə iyən Çin) bəyaniyə vasitə iyən ojə oşko votımone ki əqə İroni ımrujnə ğəroli barədə tojə bəhonəon məsələn İroni dosiyə bə Əmniyyət Şura bardeku reaksiyaon moşahid kəmon hukmən İroni ome rəftor iyən cəvob çimiku vey zumand bəbe.

İroni prezident votışe: İron hiç vaxt canqi binoəkə nıbe əmmo hiç vaxt həm yolə şəxətion vədə təslim əbe ni.