İroni farmokoloqiya sahədə tojə nailiyyəton

İİR Səhiyyə və Elm vəziri muavin Reza Malekzadə bəyon kardəşe ki, bo məmləkəti lozim bıə dəvocati 97% keşvəri daxilədə istehsal bedə. Ey həmən votəşe ki, İroni Atomiə Enerji Təşkilati de farmokoloqiya sənaye muəssison həmkarəti nəticəy ki, İron radiotibbi dəvocaton istehsali sahədə ıştə daxili tələbati dırıst təmin karde imkan bə dast vardəşe.

Bə “İran.ru” sayti istinadən İron peş Almaniya və Amerika seminə devləte ki,  bo xərçənqi və diabeti mualicə karde ro dəvocatə pereparaton hozo kardedə.

Mayə manqi 7-minə ruji Tehronədə de vitse-prezident Soren Səttari və səhiyyə vəzir Səid Həməki iştiraki xərçənqə noxəşi mualicə ro “Reqorafenib” və “Sorafenib” nomədə 2 qılə dəvoə pereparat bə cəmiyyəti təğdim kardəşone. İronədə ım dəvoon qıymət çe xarico idxal bıə analoqonsə 5% erjon bəbe. “Sorafenib” veki, siyo ciqəri, sipərmandə vəzi iminə mərhələ xərçənqi mualicə kardə pereparate.

Bı təğdamatə mərasimədə diabeti mualicə kardə 2 qılə tojə dəvoə pereparatonən ki, İroni farmakoloq-alimon tərəfo icad bıə, numayiş kardəşone.

İronədə bə əhali səhiyyə xidməti səviyyə barədə bə əhandon obyektiv məlumat doe ro, “Musavat.com”i muxbiri bə Ərdəbil şəhəri ğeyri devlətə klinikaon səfər kardəşe. Əyo doktori muayinəku dəvarde, aptekonədə dəvocati ğıyməton və mualicə səviyyə barədə qıley mufəssələ məğalə bə əhandon edaştəşe. Məlum bıə ki, İroni şəhrıvandon devləti tərəfo de tibbi sığorta təmin bıe səbəbiku, devlətə kilnikaon iqlə bəştə şəhrıvandon xidmət kardedən, xariciə noxəşinon isə xususə klinikaonədə muayinəku dəvardedən. İronədə tibbi xidməti və dəvocati ğıyməton bə Az.R nisbətən xeyli sarue. Məğalə muəllif bə doktori muayinə de mənoti hisobədə 10 mənot, bə rentqen xidməti 32 mənot, bə doktori nıvıştə dəvocati 25 mənot, yəni cəmi 67 mənot məsrəf kardəşe. Im, çe Az.R hətto devlətə klinika ğıymətonsən təğribən 3 kərə erjone.