Zərif: İron bə de Amerkə muzakirə karde meylış ni.

İroni xarıci vəzir bə Yaponiya Kiyodo aqentiyəti votışe: ətomiyə sazışiku Amerkə xaric bey iyən anti Tehron tojə iğtisadi sanksiyaon bəpeştə ijən de Amerkə muzakirə karde xoto meylımon ni.

Muhəmməd Cəvad Zərif bə Amerkə ğeyri ğanuni siyasət co kişvəron anti İron sanksiyaonədə de zu şərik karde işorə və əlovəş ka: ım iminə kərəy ki dınyoədə qıləy kişvər jıqo ğoldorəti kardedə; ım həmonə iğtisadi terrorizme.

Zərif ijən ım votımon və mısohibədə bə ehdemonon əməl nıkarde xoto Avropaku və anti Tehron sanksiyaonədə de Amerkə şərik bey xoto Yaponiyaku tənğidış ka və hol ım ki İron tam bə ıştə ehdemonon bəfodor mandəy.

İroni xarıci vəzir ısətnə şərayetədə İron və Amerkə miyono məhbuson vırə bə vırə karde ğeyri mumkin zınəş be və votışe: Amerkə karde ni bəzne ım məsələ barədə şərton mıəyyən bıkə.

İroni xarıci vəzir ımruj bə Tırkməniston, hindıstan və Yaponiya səfəron bəpeştə bə Çin varid be.

Əv Pekini Ayrportədə ətomiyə sazışi oqəte çı beynəl xalğ iştimaiyəti ko hisobış ka və votışe: əqə dınyo bə ım sazışi əhəmiyyət  etırofış bıbu bəpe bənə İron çəy hifz karde xoto cəhd bıkə və hol ım ki detosə bə ısət əməli əvəzi fəğət sıxən iyən bəyaniyə sadir bıə.

Zərif ım sahədə qıləy mısbətə hərəkəton İron iyən dınyo miyono iğtisadi əloğəon normal bey elanış karde ki ətomiyə sazişədə uzv bıə kişvəron iyən İroni duston bəpe bəy komək bıkon.