AİŞ bə İroni nişon doə təhdidon bı səfən puç bəbe.
İslamiə Enğelabiku dəvardə 40 sorədə AİŞ daima bə İroni de har vasitə təzyiğon nişon doəşe ki, bə çey hartərəfinə inkişafi mane bıbo, ey bəştə heqemonə siyasəti tabe bıkardo.
Məxsusən orəxnə soronədə İroni iğtisadi, mədəni və mudafiə sahonədə bə dast vardə nailiyyəton, həmən çey dınyo miğyasədə nufuzi həniən barz bıe, Suriya munağişədə çe Amerika murətce İŞİD-ə layihə darışte, cəvon hakim elita bərk bə təşviş dəğandəşe. Nafko əvon çe İroni dinc atomiə elmiə tədğiğatonku bənə vonə istifadə kardedəbin ki, quya İron boştə atomiə silah hozo karde niyətış heste. Hərçənd ki, çe Amerika muttəfiğon həmə de dinc atomi tədğiğ karde məşğulin, hətto “İslamazeri.com” bə "The Guardian" rujnomə istinadən xəbə dodə ki, Səudiyyə Ərəbıston çand manqi bədiqə ıştə nuvə reaktori inşa bə orəx bərosnie.
İroni rəhbəriyyət bə Amerika im vonəon orəx doe ro 2015-minə sori de dınyo 5 qılə əbərğodrətə devləton, AİŞ-ən daxil, ıştə atomiə tədğiğati oğəte barədə muğavilə dəbastışe. Əmo Amerika tojə prezident Tramp bı imi rozi nıbe, dəvardə sori elan kardışe ki, Amerika çe ım muğaviləku beşedə. Bə İroni tojə embarqo tətbiğ kardışe, ısətən bə İroniku nat hıriə keşvəron hələ-bulə omedə ki, bəvonən jıqo sanksiya tətbiğ bəkarde.
Amerika jıqo təcavuzkarə siyasət İroni devləti rəhbəriyyət ıştə ədalətinə mubarizəku bə dumo onıkırnişe. İroni İslamə enğelabi Rəhbər ayətullah Seyid Əli Xamenei votışe ki, Amerika çanədə ki, de İroni ıştə deşmenə siyasəti dəvom kardedə, de ey molağaton barde lozim ni.
Amerika muttəfiğonədə Avropa İttifaği Xariciə siyasətə xidməti katib Maya Kosyanciç`i Amerikaş bə İroni əleyh təxribəatiə hərəkətonku diəro mande dəvət karde. Pakistani XKV rəsmi koəkə Məhəmməd Feysəl`i Pakistan devləti çe AİŞ reqioni əmniyyəti təhdid kardə hərəkətonku norohət bıe bəyon kardəşe.
İraği Moskvadə səfir Heydər Mənsur Hadi bəyon kardəşe ki, İrağ bə Amerika ıştə əraziku bə İroni əleyh istifadə karde imkan nibədo. Çini XK vəzir Van İ Amerika hokumət dəvət kardəşe ki, təmkin nişon bıdo, Nezə Şərğədə əmniyyəti qıvonin nıko.
