İroni islamiyə inğilabi təsis əkə Mərhum İmom Xomeyni(r) bəfot karde sorqardımon.

Imruj Xordadə manqi 14, Rəmazanə manqi 29 və İyoni 4 minə ruje, bə təğvimi əsos ımruj de İroni islamiyə inğilabi təsis əkə Mərhum İmom Xomeyni(r) bəfot karde sorqardışi bərobəre.

30 sor çımiku bə nav bənə jıqonə rujonədə, İroni islamiyə inğilabi Yolə Rəhbər Ruhollah Musəvi Xomeyni(r) 87 sor zəhmətin iyən fəxrinə jimoni bəpeştə ki hiç faxt çı Həzrəti oqıniye boiys nıbe bəfotış kardə və bə həxi mıloğat karde əbədiyə səfər şe.

İmom Xomeyni(r) ıştə mubarizəonış hecri şəmsi 1342 minə soriku binoş kardə və de İroni Şah rejimi zılm iyən Amerkə mıdoxiləon muxalifət karde xoto seftə bə Tırkiyə və peşo bə İrağ dər be dər iyən ixric be(yəni şah rejim ə Həzrəti məcburi surətədə bə ım 2qılə kişvər vığandışe).

İmom Xomeyni(r) İrağədə 13 sor jimon karde mıddətdə çandə şaqirdonışon tərbiyə karde kənoədə Şah rejimi fəsodinə mahiyyəti oşkoş kardə və həmişə çı Amerkə ğeyri ğanuniyə mıdoxiləon və milləti həxon ğarət karde barədə deştə elaniyəon və ruşin əkə nıtğon cəmaəti oğo ijən qədə-qədə bo islamiyə inğilabi bə səbarzəti rəsero zəminəon icod əki.

Oxoy sə İroni milləti mubarizəon şiddətin bey və İmom Xomeyni(r) bə Fransə hicrət karde bəpeştə ə Həzrət de əzəmətinə fəxri hecri şəmsi 1357 minə sorədə ijən bə İron omə və İroni islamiyə inğilabi bə sabarzəti rəse cərəyonədə ıştə hidoyət və rol ifo əkə təsiron komilış kardə.

İroni islamiyə inğilabi səbarzəti bəpeştə qıle holədə ki İroni inğilabi daxıli və xarıciyə deşmənon xəbisə planon əcumlə Səddam rejimi icburiyə canq bino bıə be əmmo İmom Xomeyni(r) ujnən deştə tədbir və şucaət İroni milləti hidoyətış kardə.

De həminə mınosibəti xoto ımruj əsrə vaxti qıləy yolə mərasim Tehronəədə bıə İmom Xomeyni(r) pokə hərəmədə de cəmaəti hərorətin iyən xarıci mehmonon ıştirok bərpo bəbe.

İroni Yolə Rəhbər Həzrəte Ayətullah Xamenei ımrujnə mərosimədə sohbət iyən nıtğ bəkay.