Amerkə bepilotə təyyarə İroni sərzəmin iyən sərhəd ovonədə məhv bıə.
Amerkə rəsmi şəxson iddio və be əsosə sohbəton reaksiyadə İroni xəritə mıəyyənəkə təşkilat bəyaniyə vasitə təkidış karde ki Amerkə bepilotə cəsosiyə təyyarə İroni sərhəddi daxil bıə ovon səpe məhv bıə.
Bə İrib raporti əsos ım bəyaniyədə təsdiğ be: koşınason nəzəronədə ğeyd bıə ki Amerkə bepilotə təyyarə İroni saheliku 8 mil iyən Hurmozqani ətrof Kərətan və Koh Mubarək məntəğə miyonədə məhv bıə.
Im bəyaniyə işorəş bəkarde ki bə beynəl xalğ ğanuni əsos har kişvəri saheliku detosə 12 mil bə dıyo tərəf kişvəron sərzəmin hisob bıdə.
İroni fəritə kəşə təşkilat ijən təkidış karde: hukmən ım məhv bıə cəsosiyə təyyarə bə dıyo vılo bıə məntəğə İroni sərzəmin və əv və hisob bıdə və çəy barədə hiç şək-şobhə ni.
Tojədən İroni Xatəmol Ənbiya rəket mudafiəkə ğərorqo muavin qeneral Ğader Rəhimzodə həm təsdiğış karde ki Amerkə bə beynəl xalğ ğanuni əks bə İroni doe notaon diğğətış nı karde iyən çand kərə bə cəsosiyə təyyarə nota iyən mesaj doe bəpeştə İron bə ım təcavuzkorə təyyarə həmlə karde məcbur bıə.
Əv bə cəsosiyə təyyarə əməliyot iyən hərəkət roon kamilən mıəyyən bey işorəş karde və həminə həmlə çı Amerkə təcavuz sima və zoti nımunə zınəş be.
Xəbə ome zinə həm İroni xarıci vəzarətxonə İronədə çı Amerkə mənafe təminəkə İsveçra səfəri vanqış karde ta rəsmən Amerkə ım təcavuz və ğeyri ğanuniyə hərəkəti barədə İroni etırazi bəy elan bıkə.