Iron devləti mevğe həniən ğoym bedə.

Amerika bə İroni əleyh ıştə məkrinə imperialistə plani bə nav doə məğamədə İİR beynəlxalğə aləmədə mevğe və nufuz həniən ğoym bedə. Isət çe Amerika, hətto muttəfiğonən bə çey təcavuzə nısığı tərəfdar beşedənin, ey bə təmkin nişon doe dəvət kardedən.

Prezident Trampiən dəvardə rujonədə de Oman sultanəti rəsmiyon vasitə bə İroni devlətə rəhbəriyyəti jıqo qıley fikir rosniəşe ki, Amerika de İroni muharibə karde ne, molağat və muzakirə barde pidəşe. İm xəbə bə “Reuters”i istinadən “Nur-az.com” sayti pevolo kardəşe.

Turkiyə Xarici Koon vəzir Mevlud Çavuşoğluən bə İron rəsmiə səfər omə, deştə kolleqa Məhəmməd Cavad Zərif`i vindemon kardəşe. Əvon beynəlxalğə sahədə ım dı qılə devləton həmkarəti həniən ğoym və hevuj karde barədə bə məramnamə ğol kəşəşone.

İyunə manqi 20-ədə Cenevrədə dəvuniə 108-minə Beynəlxalğə Zəhmət Konfransi çərçivədə Az.R Sosial Mudafiə vəzir Sahil Babayev de ıştə İronıjə həmkar Məhəmməd Şəriətmədari didorədə dı qılə məmləkəti həmkarə ittifağon arədə əlağon həniən zumand karde zərurət ğeyd kardəşe. Şəriətmədariən ıştə çəvobədə votəşe ki, bımi ro xeyli yolə prespektiv, həmən imkanon hestin və Azərbaycanə Respublika tərəfış bə İron rəsmi səfər dəvət kardə.

Rusiya Parlamenti Mudafiə Komitə sədri muavin Aleksandr Şerin bə “Sputnik”i doə musahibədə İroni tərəf dəvət kardəşe ki, ıştə mudafiə ğıvvon de S-400 həvo hucumonku mudafiə komplekson təchiz bıkardo. Im bə Amerika “Petriot” raketon Nezə Şərğədə dəğande təhdidi çe İroni doə əsosinə cəvob bəbe və İroni həvo sərhədonədə asayişi tam təmin bəkarde.

Rusiya prezident Vladimir Putinən ıştə Əmniyyətə Şura qırdbemonədə Xəlice-Fars məntəğədə vəziyyəti amoxt karde ro tərəfon bə təmkin və xətomandə qəmon şonıdoe dəvət kardəşe.