Amerika İron bə muharibə təhrik karde pidəşe
Rusiya İnformasiya Aqentiyyət “İran.ru” çe Rusiya Elmon Akademiya muxbir uzv Biktor Mixin`i bə İron-Amerika ziddiyəton dair təhliliə məğalə dərc kardəşe.
Muəllif əyo ğeyd kardedə ki, Amerika bə İroni ərazi dron və 35 nəfəro ibarət hərbiə həvoperma vığandeyədə məğsədış İron bə hərbiə əməliyyaton təhrik kardebe. Əqər İroni əvonış məhv kardəbe, bəvədə Tramp bə İroni əleyh hərbiə əməliyyaton bino əke, və bımədə taxsi bə İroni qiy əne. Im plan Pentaqonədə sıftəku hozo kardəşonbe. Hətto çe Amerika İMT-i numayəndə bı barədə ım Təşkilati Əmniyyətə Şura işlasədə bo ehande ro mətnşən nıvıştəbən. Əmo İroni devləti rəhbəriyyət çe Trampi ştabi və çey jidastiə odəmon həmməysən ağılmand və diərovind beşin: İroni hərbiə ğıvvon, bepilotə ıştənpər jejone, əmo bə insonə tələfati ro nıdoşone, demiən çe Amerika təcavuzə plan bə puç bekardışone. Mixin iyo 1988-minə sori iyulə manqi 3-ədə Amerika hərbi kreyseri tərəfo İroni sərnişinə həvopeyma de raketi ənəxəbədə je fakti bə yod dəğandedə, votedə ki, Trampi komanda ısətnə ım provakasiya hozo kardeədə qımon kardedəbe ki, İroni tərəfən həmonə hadisə əvəzi beşe ro mutləğ çəvon bə İroni ərazi vığandə hərbiə həvopeyma de 35 nəfər zabiti sərnequn bəkarde. Əmo İroni tərəfi bə çəvon dast ım vonə nıdoşe.
"The Moscow Times” rujnomən xəbə dodə ki, Rusiya XKV səfir Zamir Kabulovi Moskvadə dəvardə Rusiya-İron Siyasiə Forumədə ıştə ehandə nitğədə elan kardəşe ki, qirəm İbə Ştaton bə İroni əleyh beməsuliyyətinə hərəkəton bıkardo, İron tənho nibəmande. Rusiya və hənəiən çand qılə devləton çey tərəfədə bəmanden. Rusiya XK vəziri muavin Serqey Verşinin bı barədə bəyon kardəşe ki, bə İroni əleyh hərbiə əməliyyaton ro doe əbıni, Rusiya tərəf İroni ətrofədə bə meydon beşə ziddiyyətonku norohəte.
Rusiya mudafiə vəzir Serqey Şoyqu çe Amerika bardə siyasət məhkum kardəşe, votəşe ki, İbə Ştaton həmə dınyo bəştə tabe karde pidəşe, de ım məğsədi informasiya muharibə bardedə.
