İroni muttəfiğon miğdar şe-şe vey bedə

Çe AİŞ bə İroni əleyh sanksiyon qıvonin karde qıley məğsədən İslamə Respublika beynəlxalğə aləmədə bə təcridə vəziyyət eğande bıe.

Əmo İroni devləti rəhbəriyyəti bardə mudrikə siyasət hətto Amerika muttəfiğonən bə Vaşinqtoni bardə siyasəti etiraz karde səbəb bıe. Çe Avropa 6 qılə devləti – İspaniya, Belçika, Hollandiya, İsveç və Sloveniya bahəm qıley bəyonət doəşone ki, əvon de İroni atomiə muğavilə şərton əməl karde tərəfdarin, çunki ım muğavilə məntəğədə asayişi muhafizə karde roədə yolə əhəmiyyətış heste.

Fransa prezident Fransua Makron de Trampi vindemonədə votəşe ki, çəmə vində koon bə İroni sanksiya tətbiğ karde ne, 2015-minə sori dey dəbastə muğavilə bə vırə rosnieye.

İroni tərəfi bı rujonədə elan kardışe ki, 2015-minə sori muğavilədə nəzərədə qətə bıə atomi qəncin kardə limitış ovaştə. Bə “Russia Today” televiziya votəyon istinadən “İslamazeri.com” sayt xəbə dodə ki, çe İron İslamə Respublika İMT-ədə numayəndə Məcid Təxtrəvançi bəyon kardəşe ki, de İroni bə nuvə proqrami dair muğavilə hətto ləğvən bıbo, Tehron atomə silah tumo nibəkarde.

Rusiya XKV Serqey Lavrovi İroni atomi qəncin kardə limiti ovaşte barədə votəşe ki, əqər tərəfon de İroni atomiə muğavilə oqəte pidəşonebu, bəpe ıştənən bə çey şərton əməl bıkon. İroni ım limiti ovaşte səbəb  sanksiyon nəticədə ey ziyodə atomiə məhsulon həvate imkanədə nıbeye. Lavrovi həmən Avropa İttifaği devləton dəvət kardəşe ki, de İroni dəbastə atomiə muğavilədə bəştə ehdə peqətə təəhudon icra bıkardon.

Çe Çini XKV numayəndə Qen Şuani ıştə devləti nəzər im cur izah kardəşe ki, İroni atomiə limiti ovaşte təəssufinə koe, əmo Im çe Amerika bardə siyasəti nəticəy. Ey muğavilə həmmə tərəfon bə çey şərton əməl karde  piəşe.