Ironi de Ermənistoni əlağə inkişafə perspektivon.
Çe AİŞ İroni təcrid kardə planon tam iflas bıe, həmən de ım cəhəton subut bedə ki, ısət məntəğə devləton de çəmə İslamə Respublika ıştə iğtisadi və siyasiə əlağon ovç kardovnie pidəşone.
“Nur-az.com”i bə “Urdu Roint” sayti istinadən xəbə doəşe ki, Rusiya Xarici Koon vəzir Serqey Lavrovi ıştə de İslamə Həmkariəti Təşkilati sər katib Yusif əl-Useym`i vindemonədə ərəbiə məmləkəton de İroni arədə məşvərəton bino karde barədə roziəti bə dast varde xəbə doəşe. Bə ım didori həsr bıə mətbuatə konfransədə ey votəşe ki, “əmə İron və ərəbiə keşvəron arədə muştərəkə əmniyyətə vəziyyəti bə əməl vardə muzakirəon bino kardə layihon təsdığ kardımone.”
İİR prezident Həsən Ruhani iyulə manqi 3-ədə Ermənistoni sər vəziri muavin Mqer Qruqoryan ğəbul kardəşe. “Azadlıq.info” bə İRNA aqentiyyəti əsasən nıvıştedə ki, İroni Prezidenti bı didorədə votəşe ki, “İroni xalq de Ermənistani har vaxt dust bıə, əmə ray hestemone ki, ım munasubəton həniən ğoym bıbo və ovc bıkardo”. Ruhani ımən ğeyd kardəşe ki, İroni Parlamenti de Avrasiya İğtisadiə İbemoni ozodə ticariə zona onoe barədə muğavilə ratifikasiya kardəşe. Im, de bə ım İbemoni daxil bıə məmləkəton, Ermənistoniən əz cumlə, həmkarəti inkişaf kardovnie ro çokə qirəvə bə meydon vardedə.
Rusiya və İİR Atomiə Aqentiyyəti sərdaron Aleksey Lixaçov və Əli Əkbər Salehi Moskvadə ım sahədə həmkarəti perspektivon muzakirə karde ro vindemon dəvunəşone. Bə ım didori yekunon dair İroni Rusiya səfarəti bəyanatədə votə bedə ki, tərəfon dinc atomiə enerqetika sahədə ıştə həmkarəti dəvom bəkarden, Buşer atomə elektrostansiya dıminə mərhələ inşa plani bə jimon dəbəvunien. Im xəbə bə “Mehr Nevvs”i istinadən “İran.ru” Rusiya İnformasiya Aqentiyyəti pevolo kardəşe.
