De Abdullah Ocalani band vanq

Tırkiyədə de Abdullah Ocalani band fikon devləti penə vəzifəninə xonəxon tərəfo oxonə fəxton rə-rə bə zıvon vardə bedə.

Milliyyətə Hərəkat Partiya (MHP) sərdor Devlət Baxçəli dastqirətiədə bə PKK lider Abdullah Ocalani band nuə vanqış kardə.
In həftə partiya qrup qırdemonədə qəp jə Baxçəli: “Ocalan bə təşkiloti silahon bə jiy noe iyən terrori oxo rəse əmr bıdo” təklifış doə.
De partiya lideri votey, əqəm PKK lideri təcrid be çe miyono peğətə bıbo, əv, bə Tırkiyə Yolə Millət Məclis (TBMM) bo, terrori bə orəx rəse, PKK ləğv be rəsmi elan bıko.
Tırkiyə Prezident Rəcəb Tayyib Ərdoğanən bə Devlət Baxçəli bın təklifi dastəkış doə: “Əmə bə ico terror nı bə vırədə Tırkiyə onoemon pidə” votəşe.
Cumhuriyyət Xalq Partiya (CHP) sərdor Ozgur Ozəliən partiya “bə terrori oxo beşe dastək doe” bəyonış kardə.
Cumhuriyyət Xalq Partiya liderən hisob kardə ki, terrori bə orəx rəse Tırkiyə Yolə Millət Məclisədə elan bənine.
Milliyyətə Hərəkat Partiya  lider Devlət Baxçəli partiya oktyabri 22-də dəvardə parlament qrupi qırdemonədə votəşe ki, Abdullah Ocalani  PKK ləğv karde həmən bo əçe təcridi çe miyono peğəte ro huğuği əsos bəsoxte iyən ro karde bəzne.
De Tırkiyə media nıvışte, 1999-minə sori fevraliku de “Tırk Cəzo Ğanunu”i 125-minə maddə Mərmərə dıyo İmralı çəzirəda bə dastqirəti cəzo məhkum kardə bə Abdullah Ocalan, təşkilat iyən terrori ləğvi elan kardə bə peş Ankarada mıhafizə bə kə dustoğxonə ovoştonə bə be.
Tırkiyə kırd faktori zumand be vində, əçe vəy se ro joğo qəmon şodoe məcbur bedə.