Rusiya-İron- Az.R sammiti vaxt məlum bıə
Rusiya Federasiya, İron İslamə Respublika və Azərbaycanə Respublika prezidenton arədə didori vaxt məlum bıə.
Bı barədə Rusiya Federasiya Şura sədri muavin İlyas Umaxanovi de İroni parlamenti iminə vitse-spiker Məsud Pezeşkiani vindemonədə votəşe ki, ım 3 qılə devləti sərdaron vindemon tojə formatədə avğustə manqi 14-ədə Soçi şəhərədə dəbəvarde. Im xəbə “Sputnik Azərbaycan” sayti bə RİA Novosti istinadən bə əhandon rosniəşe.
Rusiya Enerqetika vəzir Aleksandr Novak`i bəyon kardəşe ki, bə İroni əleyh sanksiyon ğeyri-ğanunie, çunki çe İbə Milləton Təşkilati tərəfo təsdığ bıə ni və jıqo hərəkəton Xəlice-Fars məntəğədə bo əmniyyəti yolə xəto bə əməl vardedə. Çe Rusiya Vyana Beynəlxalğə təşkilati numayəndə Mixail Ulyanoviən Amerika dəvət kardəşe ki, bə İroni əleyh nati embarqoku dast bıkəşo, çunki ım hərəkət Reqionədə bo əmniyyəti xəto bə əməl vardə iminə səbəbe.
Dəvardə həftədə çe İroni Ticariə Palata Sər katib Əlirza Əşrəf, İroni İslami Şura Məclisi budcə komissiya sədr Ğolamreza Tacqərdun və həniən diqər rəsmiə numayəndono ibarət qıley heyəti bə Boku səfər kardəşe. Əvon de Milli Məclisi sədri muavin Ziyafət Əsqərovi, və İğtisadiyyati vəzir Şahin Mustafayevi didoron dəvuniəşone. Bı vindemononədə tərəfon ğeyd kardəşone ki, İroni de Azərbaycani arədə əlağon hartərəfə inkişaf kardedə. Çəmə məmləkəton arədə ticari devriyyə dəvardə sori 74% ziyod bıə, İroni bə Azərbaycani iğtisadiyyati noə sərmoyə bə 3 milyard 400 milyon dollari rəsə.
Az.R Səhiyyə vəziri muavin Elsevər Ağayevi bə “Trend” sayti votəşe ki, Pirallahi Sənaye Parkədə 2 qılə dəvocatə zavodi inşa bino kardəşone. Cəvonədə qıley de İroni şirkəti bahəm inşa bedə. İm zavodon fəaliyyəti bino kardə bə peş Respublikadə əsasən bə vey istifadə bıə dəvoə pereparaton ehtiyac təmin kardə bəbe.
