Dindor bə cəzo kamera dənoə bə
Lankon Penitensiar Kompleksədə oğətə dindor Mənsur Vəlişovi bə cəzo kamera (“kars”) dənoe barədə dindoron huğuğon mıdafiəkə Arzu Abdulla bə məhbusi xeyzoni istinod məlumot pevolo kardəşe.
Mənsur Vəlişovi jimoni həmro bəyonış kardə ki, iyuli 20-də çe məhbusi zanq jə ruji çəyku xəbə bə ni. Bəvon peşo bəlli bə ki, əv bə cəzo kamera dənoə bə və Penitensiar Xıdmətiku Mənsur Vəlişovi “dılə ğaydon darışte ro” cəzo se votəşone. Konkret kom ğayda dırışte barədə məlumot doə bə ni.De əvlodon votəy, Vəlişov noxəşinə məhbusi kue etiroz karde ro cəzoş sə.Əvon hisob kardən ki, Mənsur Vəlişovi bə Umboku Penitensiar Kompleksədə bastə dastqirxonə vığande ro bəçəy vəynə intizom tədbiron tətbiğ bedən.Mənsur Vəlişov 2023-minə sori martə manqədə İmişli polis idarə koəkon tərəfo qətə bə və de Cinoyət Məcəllə beğanuni narkotik vasiton, psixotrop maddon hozzo karde, istehsol, bə dast varde, oğəte, kırniye,vığande və ya həvate kulli miğdarədə kardeədə maddə ittihom bə. De Lankon Qonə Cinoyəton Məhkəmə hukmi əv 6 sor mıddət ozodətiku məhrum kardə bə. Mənsur Vəlişov ittihomon ğəbul kardə ni, dindorəti ro təğib be votedə.Bə Azərboyconi Siyosi Məhbuson Ozodəti İbemoni 2026-mınə sorədə oşko kardə siyosi məhbus siyohəda 182 kəs dindor hıstei. Huğuğ mıdafiəkon çın xonəxon veyni bə slə dini icmo mənsub be və de narkotik ittihomon dastqir be bəyon kardedən.
