Amerika əvıjınon de İroni bə hərbiə konfilkti əleyin
Harvard CAPS/Harris-i dəvuniə və “The Hill” rujnomədə dərc bıə parseşi nəticəonku məlum bıə ki, çe Amerika əvıjınon 78% de İroni bə muharibə bino karde əleyhin. Im parseşi həmən nişon doəşe ki, amerikavojə respondenton 57% de İroni umumən bə hərbiə konfrontasiya tərəfdar nin, çəvonədə cəmi 5% Trampi bardə ısətnə siyasəti bəqəm kardedə. Im xəbə “İran.ru” Rusiya İnformasiya Aqentiyyəti pevolo kardəşe.
Rusiya AİŞ bə İroni səpe noə sanksiyon pape nibəbe və de İroni ıştə ticarəti dəvom bəkarde. Im fikir bə “RİA Novosti” aqentiyyəti musahibədə çe Rusiya Avropa İttifağədə daimiə Numayəndəti sərdar Vladimir Çijov`i bə zıvon vardəşe. Ey votəşe ki, çəməku parsedən ki, Rusiya, həmən Çin boçi İNTEX sistemi analoqi onodəni? Əmənən çəvob dodəmon ki, bımi ehtiyoc ni. Çunki əmə bə Amerika noə sanksiyon əməl nibəkardemon. Bəştə de İroni ticari mubadilon dəvom bədomon.
Məlume ki, İİR prezident Həsən Ruhani bə İron oməkəson pasporti sərhədədə piçat nıjəne barədə dəstur doəşe ki, əvon bə Ametika irtica siyasəti hədəf nıbon. “Sputnik Azərbaycan” sayti ım dəsturi bə Az.R şəhrıvandonən aid bıe həxədə bə İroni Boku səfarətxonə pars doəşe. Səfarəti mətbuatə katib Seyid Əli Musəvi təsdığ kardəşe ki, ım ğəror bə Az.R şəhrıvandonən aide. Ekspert-jurnalist Fərhad Daneşvər çe prezident Ruhani ım ğərori barədə votəşe ki, dəvardə sori turizmi bə İroni 11 milyard 800 milyon dollar mənfəət vardəşe. 2018-minə sori bə İron səfər kardə turiston miğdar bə navonə sori nisbətədə 52% ziyod bıə, bə 7 milyon 800 həzo nəfəri rəsə. Amerika murtəce siyasəti qıley hədəfən ıme ki, de bə İron omə turiston viza rejimi məhdud karde roy çey turizmə imkanon vəy bısəno. İroni Prezidenti ım ğəror Amerika jıqo bədxahə niyyəti və seşe.
