İroni Yolə Rəhbər: ətomiyə sazışədə İroni ehdəmonon kam karde dəvom peydo bəkay.

İroni Yolə Rəhbər Avropa tələbkaranə rəftoron tənğidış karde və votışe: ətomiyə sazışi çərçivədə İroni ehdəmonon kam karde tojədən bino bıə və hukmən dəvom peydo bəkarde.

İroni Yolə Rəhbər Həzrəte Ayətullah Xamenei zinə sıb İroni cumə İmomon vindemonədə bə ğərbion həsrət çəşi vədə İroni milləti əzəmət və inkişofi dəvom işorəş karde və votışe: yolə şəxəti bois bıə ki ğərbion həğiğəti dərk karde ojiz bıbun ki əlbətə jıqonə rəftor zəifə kişvəron vədə muvəffəğiyəton bois bəbe iyən zumand və ıştəniku mudafiə əkə milləton vədə ğərbion ım şivə hukmən məğlob bə nine.

İroni Yolə Rəhbər bə İroni xarıci vəziri oşko sohbəton Avropa 11 qılə şərton icra nı bey barədə stnadış karde və hamiyəşone: əmə bə ətomiyə muğavilə və hətto çəyku vey əhdəmonon əməl kardımone əmmo ısət ki çəvon be ğanun və bəd əhdə rəftoron xoto ıştə əhdəmonon kam karde pidəmone Avropa de tələbkaranə  iyən yolə şəxə rəftori reaksiya nışo dədən.

 Həzrəte Ayətullah Xamenei təkidış karde: Avropa ki bəştə hiç qılə əhdəmonon əməlış nıkarde de kom həxi və çoknə pidəşe ki əmə bə muğavilə əməl kəmon.

Ə Həzrət İnqiltərə bənə dıyo dızdon kardə ku tənğidış karde və votışone: əvoni ki çəvon deşmənçiti və xəbisə ku oşko bıə çəmə keştişon dıdiyəşone əmmo cəhd kardən ki ım dızdəku bənə ğanuni hərəkət nışo bıdən; əlbətə İroni momenə qrupon jıqonə hərəkəton be cəvob ni bənan iyən mınosibə faxt və vırədə reaksiya nışo bedan.

İroni Yolə Rəhbər mudafiə fəxrinə ğudrəti muğəddəsə mudafiə dıvranədə xarıcionku nomid bey nəticəku zınəş be və hamiyəşone: de mıstəğilə hərəkəton iğtisad sahədə həm muvəffəğiyət icod bəbe.