İroni iğtisadi və siyasi muvəffəğiyyəton
Avğustə manqi 12-də Rusiya, İron və Az.R devləton ıştə enerji sistemi bənə vahid şəbəkə onone dair texniki layihon əsasin karde barədə saziş dəbastışone. RİA Novosti xəbə doşe ki, çe Rusiya “Sistemnıy operator” və “Rosseti”, İroni “Tavanir”, Azərbaycanə Respublika “Azərenerji” kompaniyon bahəm 1 sori muddətədə ım layihə sənədon hozo bəkarden.
Ostoro sərhəd ovaştə məntəğədə İroni de Azərbaycanə Respublika arədə muştərəkə ticarətə dərvazə bə istifadə bədon. Ostoro Kemruqə İdarə rəis Rəsul Omidi votəşe ki, İron bə Avroasiya Ticari Təşkilati uzv bıə bəpeş Ostoro ovaştə məntəğə de ım təşkilati uzv məmləkəton ticarət kardeədə məxsusi vırə qətedə. Orəxnə 1 sorədə çe ım məntəğəku ovaştə məhsulon miğdar 30% ziyod bıə. Ticarətə dərvazə inşa koon 70% icra bıən, omə sori ey bə istifadə bədon.
İroni de Az.R arədə muştərəkə peyk istehsal karde barədə molağaton bino bıən. Bı barədə Tehronədə bə “Trend”i muxbiri Azərbaycani Barzə Texnoloqiya və Nəğliyyati vəzir Ramin Quluzadə qəp jəşe, votəşe ki, nezə vaxtonədə “Azərkosmos”i de İroni muvafiğə şirkəton arədə roziyəti bə dast vardə bəbe.
İron İslamə Respublika hokuməti elan kardəşe ki, tosə ayəndə sori orəxi məmləkəti Çabahar okeanə limani de Miyonə Asiya onoə osonə ro bə istifadə doə bəbe. Hokuməti bımi ro 950 milyon dollar vəsait co kardəşe. Im osonə ro xətt çe Çabahar limaniku bino bəbe, Sistan və Bəlucestoni mərkəz Zahedaniku dəbəvarde , tosə Seraxs şəhəri ki, de Turkmənistoni marzədə ğərorış qətə, dıroz bəbe. Bı həxədə İroni vitse-prezident Məhəmməd Baker Noubəxt`i bə İRNA məlumat doəşe.
İronıjə tələbon dəvardə həftədə 31-minə Beynəlxalğə İnformatika Olimpiadədə ki, Bokuədə təşkil kardəşonbe, 88 qılə məmləkəton arədə 4 minə vırə qətəşone. Navonə vıron Rusiya, Amerika və Cini tələbəon bə dast vardəşone. Çimi manqi bə nav İroni “Şərif” universiteti tələbəonən İbə Ştatonədə dəvardə kosmik proyekton hozo kardə musabiğədə 2 –minə vırə qətəşonbıe. Im nailiyyəton İroni təhsilə sistemi dınyoədə navğədəm qıley mevğeyədə mande nison dodə.
