İİR prezident Həsən Ruhani Avrasiya İğtisadiə İttifaği sammitədə iştirak kardəşe

Oktyabrə manqi sıftənə ruji Yerevanədə Avrasiya İğtisadiə İttifaği (Aİİ) Ali Şura sammit dəvarde. Im tədbirədə 8 qılə devləti - İttifaği 5 qılə daimiə uzv- Rusiya, Belorusiya, Ğəzaxıston, Erməniston və Qırğızlstoni, həmən İron, Moldova və Sinqapuri sərdaron şirkət kardəşone.

İroni prezident Həsən Ruhani ğeyd kardəşe ki, ım forumi, bo İron devləti muhum əhəmiyyət hestışe. Çe 1979-minə sori  İslamə İnğilabi bəpeş bə joqo beynəlxalğə proyekti umjən qınie bo İroni mislış nıbə hadisəy. İroni Rusiyadə səfir Mehdi Sənai`ən ıştə məmləkəti bə Aİİ umjən bıe qıley tarixiə hadisə zınəşe.

  İron çe oktyabrə manqi 27-iku bə ım İttifaği Azad Ticariə Zona rəsmən daxil bedə. Imən bey səbəb bəbe ki, əv ıştə 502 nomədə məhsuli bə 183 milyon nəfəro ibarət qıley vıjor bemaneə bekarde imkanədə bəbe. Bə  ım təşkilati daxil bıə devləton 1 sornə umumdaxili məhsuli həcm 4 trillion dollari ğədərədəy.

Prezident Ruhani həmən votəşe ki, Amerika bə İroni maksimum təzyiğ nişon doə şəraitədə İslamə Respublika bə Aİİ ğoş qınie bə çəmə məmləkəti iğtisadiyyati həniən ovc karde, Vaşinqtoni tətbiğ kardə sanksion bə puç bekarde bəvarde bebəkarde. Ey sammitədə iştirak kardə devlətə sərdaron dəvət kardəşe ki, ıştə ticari molon tranzitədə çe İroni bənə Ostoro, Ənzəli, Əmirabad, Firedunkenar, İmam Xomeyni, Bəndər-Abbas, Cəsk, Çabahar limanonku fəal istifadə bıkon.

Həsən Ruhani sammiti qardışədə de Rusiya prezident Vladimir Putini, həmən de Ermənistoni Sər vəzir Nikol Paşinyani dıtərəfinə vindemon dəvunişe.

Aİİ 2015-minə sori yanvarə manqi 1-minə rujiku de 3 qlıə devləti – Rusiya, Belorusiya və Ğəzaxıstoni iştiraki bə fəaliyyət bino kardəşe. Çəyo Erməniston de Qırğızıstoni bey unmjən qıniən. Isət çəş kardə bedə ki, tojə uzvonən, məsələn Uzbəkistonən, bə çey tərkib daxil bıbon.