Deşmenon bə Ərbəin şemoni mane bıe pidəşone

İmom Huseyn (ə) şəhadəti Çılımə mərasim, yəni Ərbəin de miladi təğvimi bə oktyabrə manqi 19-minə ruj eqınedə. Maide.az bə İQNA istinadən xəbə dodə ki, bənə har sornə çe İraği “Rəsul-Biyşə” rayoniku bə Kərbəlo tərəf şemon hələ 2 həftə bə nav bino bıə. Im şemonədə iştirakəkon Həzrəti Huseyn (ə) məğbərə ziyarət karde ro 500 km məsafə piyodə şemon bəkarden.

İroni Ostoro şəhəri sərhəd ovaştə məntəğədə de şəhəri fərmandar, imom çumə, və diqər devlətə məsul şəxson iştiraki xariciə Ərbəinə zəvvaron pişvazə mərasim təşkil bıə. Həmonə ruji çe Azərbaycanə Respublika əsasən Qəncə şəhəriku 100 nəfər zəvvar bə İron daxil bıən. Çe Ostoro Ərbəin xidmət komitə mudir Cəmşid Mədhəvi votəşe ki, vəomə rujonədə xarici zəvvaron həniən ziyod be çəş kardedəmon.

Im curə xidmətə şərait İroni tərəfi Biləsıvo sərhədə məntəğədən təşkil bıə. Bə “Həzrəte Seyyid-uş-Suhəda” nominə ım mokəbi mudir Nadir Purəta sıxanon əsasən, çəvon təşkilat 4 sore ki, fəaliyyətış heste,  ımsornə Ərbəin mərasimədə əvon çe Az.R-ku omə 10 həzo zəvvari xidmətədə mande nəzərədə qətedən.

Əmo çe Əhli –Beyt (ə) məktəbi tərəfdaron sorbəsor zumand bıə Ərbəin hərəkati əzəməti bə deşmenon dıl qıley təşviş dəğandəşe.  Sputnik Azərbaycan bə “Fars” Xəbər Aqentiyyəti istinadən Tehroni cımmə nomoji xətib ayətullah İmami Kaşani qəp bə əhandon edaştəşe. Ayətullah Kaşani votəşe ki, “ deşmenon çe 20 milyon zəvvari bə Kərbəlo şemoni ğəbul karde zınedənin. Əvon pidəşon ni ki, İmom Huseyn (ə) pərçəm bılınd bıbo, bı səbəbən bə  Ərbein şemoni mane bıe ro cəhdon nişon dodən.

Ğeyd karde lozime ki, İrağədə bə hokuməti əleyh kutləviə etirazə aksiyon səbəbiku oktyabrə manqi 1-minə ruji  İraği de İroni sərhəd ovaştə məntəğəon dəbastəşbe. Həmonə aksiyonədə tosə 100 nəfəri tələf, 2 həzo nəfəri zəxmin bıe xəbə doəşonbe.