Tehroni cumə nımoji xətib votışe: qeneral Suleymani əmniyyət icodəkə be.

Tehroni zinə ruji cumə nımoji xətib, şəhid Ğasım Suleymani qıləy sulh icodəkə fərmondə bə hisobış varde və votışe: İron, məntəğə və islamiyə kişvəron atmosfer dəvardə haftədə ilahi təğvaku pur be.

Huccətul İslam vəlmoslımin hac Əliəkbəri bə qeneral Suleymani təğva işorəş karde və əlovəş ka: ım yolə sərdor, məntəğə DAEŞ terroristiyə qrupiku ozodış karde və de Asiya ğərbədə əmniyyəti və stabilə vəziyəti icod karde, muğavimət mədəniyəti rəvocış do.

Tehroni cumə nımoji xətib votışe: muğavimət mehvərədə de Ğasım Suleymani nıfuzi, İroni əmniyyət qarantiya və dınyoədə əmniyyət his be, qıləy əmniyyət ki fəalə muğaviməti vasitə bə dast ome.

Hac Əliəkbəri ijən votışe: qeneral Suleymani de İroni islamiyə inğilabi təsisəkə mərhum İmom Xomeyni(r)ku təbəiyət karde, muğavimət həvujə məntəğədə vey momen, şucae və ağılmandə ğıvvon tərbiyətış karde ki bə məntəğədə muğavimət mədəniyəti inkişofi vey liyoğətinə komək be.

Tehroni cumə nımoji xətib bə muğavimət cəhbə məşhurə fərmondə terroədə Amerkə yolə səhv işorəş karde və votışe: qeneral Suleymani və çəy həmrəzmon şəhodət iyən bə ehtırom karde xoto islamiyə umməti bəsirətinə vahidə iştirok İroni islamiyə inğilobədə qıləy muhimmə mərhələ be.

İslami inğilabi nığo doə Ğuds ğıvvə fərmondə qeneral Suleymani cumə yanvari 3 nə ruji bə İraği rəsmiyə şəxson dəvəti əsosi bə ım məmləkət səfərış kardə be və  Həşsuı-şəbi muavin Əbuməhdi Əlmohəndes və 8 nəfər ki dəy həmro bin Amerkə mutəcavez və  terroristiyə ğıvvon bə İraği Bəğdadı aeroporti nezi hucumədə bə şəhodət rəsin.