İslamiə İnğilabi İronış bə reqioni əbərğodrət peqordıniə.
Bəhmənə manqi 22, de Miladi təğvimi fevrali 11-ədə, İroni xəlğ de çand milyonon İslamə İnğilabi 41-minə sorəğardışə ruji ğeyd karde ro bə kuçə və meydonon beşin. Hokuməti rəsmən elan kardışe ki, ım tarixiə hadisə çe məmləkəti 5 həzo 200 məntəğə və çe İroni həmə dınyo səfarət və konsulatonədə ğeyd kardə bəbe.
Bə “İran.ru”sayti doə xəbə əsasən, Tehronədə numayişkaron bə Amerika və sionistə rejimi cinayəton əleyh bənə mısılmonon vəhdəti, muğavimətə hərəkatədə iştirak kardə devləton pərçəmon ros kardəşone. İroni aliməğamə devlətə vəzifədaron, prezident Həsən Ruhani, parlamenti sıxanəvot Əli Laricani, Xarici Koon Vəzir Məhəmməd Cavad Zərif və həniən co şəxson bə xalği şemoni uməjən qıniən, Prezident Ruhani bı mərasimədə həmən nitğ ehandəşe.
Ali Rəhbər Ayətullah Seyid Əli Xamenei de ım sandinə idi munasibəti 2 həzo 315 nəfər məhbus əfv kardışe.
Bə ım sorəqardışi həsr bıə mərasimon İroni Moskva və Boku səfarətonədən dəvuniəşone. Moskvadə dəvardə tədbirədə Tolışə diaspora numayəndon İsmayıl Şabanov və Adil Nəsiroviən iştirakşon bıə.
Boku səfarətədə təşkil bıə ğəbulədə Boku hokuməti numayəndon, Milli Məclisi deputaton, mədəni, ictimai və dini xadimon iştirak kardəşone. Səfir Cavad Cahangirzadə İnğilabi bə peş İroni dəvardə barzə inkişafi yekunon, ım inğilabi bə cəmiyyəti doə bəhrəon həxədə qəp jəşe. Həmən ğeyd kardəşe ki, cənab İlham Əliyevi de doktor Həsən Ruhani dəvəti nezə vaxtonədə bə Tehron səfər karde çəmə dustiəti və bəradərəti əbədi bıe qıley nışonəy.
Sər vəziri muavin Şahin Mustafayeviən ıştə nitğədə çe Prezident Əliyevi nomo de ım əlamətinə ruji munasibəti İroni xəlğ təbrik kardışe, votışe ki, İroni bə dast vardə har nailiyyət bənə qıley nezə dusti Ozərbaycani xalğiən həmişə şo kardedə, Bandı-kuhə Ğərəboği munağişədə İroni numayiş kardə ədalətinə mevğe çəmə xalğon arədə dustiəti munasibəton həniən zumand kardedə.
Turkiyə Vətənpərvəron Partiya sədr Doqu Perinçek bə İRNA votəşe ki, İslamə İnğilabi de Amerika və sionizmi mubarizədə İronış bə reqioni əbərğodrət peqordıniə.
