İronədə 291 nəfər bə koronavirusi mıbtəlo bıə kəson çok bıdən.

İroni səhiyyə vəzarətxonə elanış karde ki detosə bə ısət İronədə 291 nəfər bə koronavirusi mıbtəlo bıə kəson çok bey bəpeştə noxəşxonəonku ozod bıdən.

Bə oxonə raporti əsos detosə bə ısət 1500 nəfər bə koronavirusi mıbtəlo bıdən ki çəvonku 66 nəfər mardən.

Əmmo İroni dıvləti sıxənəvot elanış karde ki İronədə noronavirusi qəte kəson miğdori oşko elan karde xoto İron çı dınyo qıləy navdəşə kişvəron heste ki bə siyasi və iğtisodi illəton xoto çəy barədə bə millət rost voteydə.

Əli Rəbie təkidış karde ki İroni səhiyyə vəzarətxonə şərayeti kontrol kardedə.

Əmmo İroniku xəbə ome ki İroni cıvonə eltiyaon və muasir bə elmi əsos bıə şirkəton koronavirusi damoni soxtə holədən və ım sahədə çokə hərəkəton əncom be.

Bə İron çı dınyo səhiyyə beynəl xalğ təşkilat və bənə Çin bıə dustə kişvəron koməkon həm dəvom kardedə.

İroni xarıci vəzir Muhəmməd Cəvad Zərif tojədən qıləy Twitter mesajədə dınyo səhiyyə təşkilaton həmkari və koməkon bə təğdiri loyiğ bə hisobış varde.

Tehronədə Çini səfarətxonə həm Çinədə koronavirusi şiddətin rəvoc peydo karde zəmonədə İroni bə Çin doe koməkonku ğədrdontiş karde və elanış karde ki detosə koronavirusi məhv karde zəmon əme İroni kənoədəmon.